Tšeliso Thakholi Semathi se hloahloa sa mabelo a malelele, ‘Neheng Melida Khatala o amohetse tšehetso ea bokhotho-khotho ba chelete e kaalo ka M250,000.00, ho tsoa Morafong oa Taemane oa Kao, tšebeletsong e neng e tšoaretsoe Lancers Inn, Maseru ka la 10 Pulungoana 2023. Chelete ena o tla e fuoa ka likarolo khoeli le khoeli ho mo thusa ho itokisetsa ho phunyeletsa ho ea litlholisanong tsa Machaba tsa Li-Olympic Games tse il’o tšoareloa Paris, France ka la 10 Phato isao.
Ho ea ka Mookameli oa Tikoloho le Ntšetsopele ea Sechaba Morafong oa Kao, Mofumahali ‘Malehlohonolo Mojaki, Morafo oa Kao o thehile leano la ho khutlisetsa sechabeng, le bopiloeng ka mafapha a mararo, e leng ho ntlafatsa bacha, ho fana ka litsebo tsa 
le ho betla litalenta tsa bacha ho bona hore ba iphelisa ka tsona. Ke mona moo ba ileng ba etsa qeto ea ho tšehetsa semathi sena.
Letona la Lipapali, Mohlomphehi Motlatsi Maqelepo o lebohile morafo ka mpho ena ea bohlokoa. A tiisa hore lipapali li fetola bophelo ba sechaba, ‘me ka tsona bacha ba ka tseba ho iphelisa.
Ausi ‘Neheng Khatala o lebohile tšehetso eo a e fumaneng, ho tsoa Morafong oa Kao. A tšepisa ho sebetsa ka thata ho phunyeletsa ho ea litlholisanong tsa Li-Olympic Games, a ipapisitse le linako tseo ba li filoeng hore ba li fihlele, ho latela mekhahlelo e fapakaneng ea mabelo.
