Tšeliso Thakholi
Mookameli oa Letlole la Litsela(Road Fund), Monghali Nkekeletse Makara o nehelane ka thepa ea litulo tse 100, tsa boleng ba chelete e kaalo ka M125,000.00 Sekolong sa Mathomo sa Motimposo, tšebeletsong e neng e tšoaretsoe Motimposo, Maseru, ka la 19 Mphalane monongoaha.
Makara o bontšitse hore botsamaisi ba sekolo bo ne bo ngotse lintho tse ngata tseo ba neng ba kopile thuso ka tsona, tse kenyeletsang matloana a sekolo kaha a se maemong a matle. Empa itse ha ba sheba ka pokothong ba fumana hore ba ka tseba ho ba rekela litulo, tseo ho ka lulang bana ba babeli. A re seo ba se entseng kajeno se fihletse matsohong a nepahetseng, ‘me se tlil’o tlisa phetoho e kholo bophelong ba bana kajeno le ka moso, kaha ba tla tseba ho ithuta ka mokhoa o hantle ho feta pele.
Mookameli oa Sekolo Monghali Molefi Mafanti o itse mpho ena e bolela ntho e kholo ho Lekala la Thuto, litichere le sechaba kaha e tlisa thabo ho ngoana oa Mosotho ea phelang Motimposo. “E tlil’o le etsa hore le atlehe ho feta ka moo le ntseng le atleha ka teng.” O boletse joalo a bile a etsa boitlamo ka pele ho Road Fund le ho Lekala la Thuto le Koetliso hore ba lebelle liphetoho tse kholo lihlahlobong tsa mapomelo tsa monongoaha le selemong se tlang.
Lebitsong la Kereke e Katholike, Fr. Clement Tampane OMI o itse Kereke e aha likolo ka morero oa ho khahlametsa sechaba sa Basotho hore se tsebe ho ruteha. A re ho monate e bile ho bohlokoa ho hlokomela hore bona e le Kereke ha ba bang, tabeng ea ho fihlela thuto ea boleng bo phahameng. A ipiletsa ho bafani ba bang ho etsa letsoho la monna kaha litlhoko tsa sekolo sena li le ngata. A qetella ka ho leboha Road Fund ka mosebetsi ona o motle oo ba o entseng.
Lebitsong la Lekala la Thuto le Koetliso, Mofumahali Seriti Morojele o boletse hore tlhoko e kholo haholo likolong naha ka bophara, empa khomo ha li kae batho re bangata. A re ka lebaka la maemo a leholimo a sa jeseng litheohelang, boholo ba likolo li fefotsoe ke moea, ‘me sena se bolela hore mokotla oo e bang o ne o le teng oa lekala o masoba.
A re morero o moholo oa lekala ke ho khutlela ho litichere ho tla ba fa malebela hore ba ntlafatse thuto ea bana. “Re leboha Road Fund le bohle ka tšebetso e ntle eo ba e etsang. Molemo ke ha o tlisa phetoho mothong e mong.” O boletse joalo a bile a eketsa ka hore sekolo sena ke se seng sa likolo tse kholo kahar’a naha, se bana le litichere tse ngata ka lebaka la bonngoe le tšebelisano ‘moho e teng kahar’a botsamaisi ba sona.
