Tšeliso Thakholi Setho sa mehleng sa Paramente ea Lesotho sa Lebatooa la Ha Mabote, Fako Moshoeshoe o timetse kamor’a ho thunyetsoa lefu Mohalalitoe, Maseru, tseleng ea Main North 1 mesong ea maobane.
Tlaleho ea mathomo ea Sepolesa e supa Mohlomphehi o ne a tsamaea tseleng ea Main North 1 a leba selika-likoeng se seholo sa sephethephethe, a hlaha ‘nqa ea Ha Mabote. H’a le haufi le motse oa Mohalalitoe, koloi ea hae e ile ea thuloa ka morao, ke mosali oa Afrika Boroa ea ka bang lilemo li 31, ‘me hang ho ba koloi a ema joalokaha e le tloaelo.
Sepolesa se re hona nakong eo, ho ile ha eba le puisano, lipakeng tsa baqhobi bana ba babeli, ‘me ha lumellanoa mosali ea chahisitseng koloi ea Moshoeshoe o tlae lefa. Fako a re o batla litumellano tse ngotsoeng.
Sepolesa se re ke hona moo khang e ileng ea hlaha hona teng, ho fihlela ha mosali eo a letsetsa e mong motsoala’e eo pelaelo e leng hore o lula motseng oa Lithabaneng, e leng monna oa Mosotho ea ka bang lilemo li 37. Sa bontša hore ‘melaelloa o ile a tla sebakeng sa ketsahalo, ‘me itseng h’a fihla a fumana ho se ho lumellanoe hore litefo li tla e tsoa ha mapolesa a se fihlile. “Ebe mosali enoa o re eena oa tsamaea kaha o tlil’o lefa koloi, h’a utloisise hore na o emela mapolesa ka mabaka a fe.” Sepolesa se re ke hona moo qoaketsano e ileng ea boela ea qhoma hape, ‘me Fako a ea koloing ea hae a tla a se a nkile sethunya. Athe motsoal’a mosali ea chaisitseng koloi ea Fako, o se a ntse a nkile sethunya ho eena mona. Ke ha a se tsomula thekeng ho eena, a mo tšela ka lethala la likulo, eba o felloa ke bophelo hang-hang sebakeng sa ketsahalo. Sepolesa se phethetse ka hore lithunya tsa bona ka bobeli li fumanehile sebakeng sa ketsahalo, ‘me le monna eo ea lilemo li 37 o se a le matsohong a sepolesa.
