Nthabeleng Seitlheko Letona la Lichelete Dr. Rets’elisitsoe Matlanyane, o hlahisitse kapel’a sechaba Mookameli e mocha oa Setsi sa Pokello ea Lekhetho (RSL),Mathabo Mokoko, ka la 4 Loetse monongoaha.
A re mafelong a selemo sa 2022, setsi sa pokello ea lekhetho se ile sa etsa phetoho kamora hore eo e neng e le mookameli oa setsi seo, Thabo Khasipe a tsamaee kamora hore konteraka ea hae e felloe ke nako. O re boto ea setsi e ile ea qalella ho batla eo e tla ba mookameli oa setsi seo, ‘me letona le ile la amohela khetho ea Mokoko ‘me leeto leo le nkile likhoeli tse 8.
Matlanyane o bile a lebohela ea khethiloeng ele mookameli oa setsi sa pokello ea lekhetho, kaha a sebelitse setsing sena nako e telele, ‘me a tsebile ho sebetsa lintho tse ‘maloa tse etsang hore a ananeloe, kahoo ba lumela hore litsebo tsa hae li tla tlisa boetapele bo botle ts’ebetsong ea hae.
A supa hore Mokoko o kena mosebetsing ona nakong e thata eo lefats’e le shebaneng le maemo a fokolang a moruo o thefulehileng ka lebaka la COVID-19 le pheto-phetoho ea leholimo. A re e le ‘muso ba hloka ho ntlafatsa litsi tsa bophelo, ntlafalo ea mebila, khaho ea marokho le tse ling, ‘me ba lokela ho sebetsa ka thata ho bona hore Lesotho eba naha e shebahalang hantle, ba bone hore ba tsamaisa lekhetho ka tsela e nepahetseng.
A re hona joale re phela nakong ea ts’ebeliso ea marang-rang le likhoebo tse ngata li sebelisa marang-rang, ka hona ba lokela ho sebetsa ba khema le linako. A re ho bohlokoa ho sebelisa marang-rang ha ho lefshoa batho ‘me ha likhoebo tsohle li ka a sebelisa setsi se tla nolofalloa ke ho bokella lekhetho, ‘me ha ho motho ea tla chophoha hoba bohle ba tla lefa.
“Mosebetsi ona o boima o tlo lula mahetleng a hau, ke boikarabello bo boholo boo sechaba sa Basotho se bo behang matsohong a hau, ba lebelletse mosebetsi o etsoang ka makhethe ka tsela eo sechaba se tla fana ka ts’ehetso.” Dr Matlanyane a bua le Mokoko.
O supile hore boemo ba pokello ea lekhetho bo tlaase ka lebaka la moruo o putlameng ke kahoo a khothaletsang ts’ebeliso ea marang-rang ho lefa lekhetho. A re joaloka Letona la Lichelete o tla khotsofala ha Lesotho le ntlafetse, Basotho ba fumana lits’ebeletso.
Mokoko o tla nka lilemo tse tharo a ntse a le ts’ebetsong ka konteraka e ka nchafatsoang nakong ea lilemo tse ts’eletseng.
Mookameli oa Setsi sa Pokello ea Lekhetho (RSL)’Mathabo Mokoko, o itse o leboha monyetla ona ‘me o kopa Basotho ba mo rapelle. O re RSL e bile tlasa botsamaisi bo hloahloa ba banna ba bane, ba mo holisitseng ka hona o tobane le mosebetsi o matla.
A re lintho tse tharo tseo a tla sebetsana le tsona ha kena ts’ebetsong ke ho aha kopano kahara setsi sa pokello ea lekhetho, batho ba natefeloe ba phele hantle ‘meleng le kelellong tsa bona hore ba tle ba fane ka lits’ebeletso tsa boleng. O re o tla aha tsela ea bona ea ts’ebetso ea marang-rang e tla ba beha leseling ka tsela e nepahetseng ka se etsahalang ts’ebetsong ea bona.
A re mosebetsi oa bona ke oa sechaba, ka hona hore lintlha li tle li nepahale o tlameha ho sebetsa le sechaba, a ba nolofaletse ho lefa lekhetho ka mekhoa e bobebe. A re ke monyetla oa bona ele Afrika hore ba hoebisane ‘me lekhetlo la pele o rata hore Basotho ba ke ba khaotse ho ba baji empa ba tsoe ba rekisetse linaha tse ling.
