Nthabeleng Seitlheko Motsamaisi oa Likhetho Mpaiphele Maqutu, o re AD e itlhomme pele ho tlaleha ka ts’ebeliso ea lichelete tsohle tseo e li abetsoeng, ha RFP e ipabotse boemong ba ho tlaleha chelete tse thusitseng mokha nakong ea boiketo ba likhetho. Tsena li hlahelletse ‘mokeng oa bo-ralitaba oa la 5 Loetse monongoaha.
A re mekha le makhotla a lipolotiki a sa ikobeleng molao le ho tlaleha ts’ebeliso ea lichelete tse fanoang ke IEC a tlo nkeloa likhato tsa molao le ho hlakoloa lenaneng la mekha le makhotla a lipolotiki a ngolisitsoeng. A re ba hloka mekha le makhotla a lipolotiki a ikobelang molao eseng ba etse borata ka lichelete tsa sechaba.
A re ha chelete e sa tlalehoe ka nako e bakela bakhethi mathata ‘moho le komisi kaha chelete eo e lula e le sekoloto libukeng tsa bona. A re ha ba na ho emisa ho hlakola mekha le makhotla a lipolotiki ha ho lokeleha hore ba etse joalo haholo boemong boo batho ba sa ikobeleng molao le lipehelo tsa komisi.
A re likhethong tsa la 7 Mphalane 2022, Mokha o kaholimo o filoe chelete e kaholimo ho 1.6 million e le ea boiketo sebakeng sa likhetho, empa kakaretso ea chelete e tsoang mokotleng oa ‘muso e bile 20 million e abeloang mekha le makhotla a lipolotiki nakong ea boiketo, empa ke mekha le makhotla a 14 a fanang ka litlaleho tse hlakileng tsa ts’ebeliso ea lichelete.
A re ke mekha le makhotla a mahlano ao esaleng a sa ikamahanye le tsamaiso ea lichelete, ba ngotse mangolo a ‘maloa empa ha ho likhato tseo a li etsang. A re a fumana 3.3 million ho latela boemo ba litulo paramenteng, ha e itlhommeng pele e fumana 1.9 million selemo le selemo.
A re e lokela ho tlaleha ts’ebetso ea chelete eohle eo ba e fumanang ho hlaha kantle, kaha molao oa likhetho o tlama hore e sebelisoe. A re ke mokha o le mong o atlehileng ho tlaleha chelete eleng RFP.
