Tšeliso Thakholi Nonyana li ne li lula batho mabaleng a Sekolo se Phahameng sa Christ the King, Roma, ka la Labohlano la la 1 Loetse 2023, moo litichere, barutoana ba mehleng, boemeli ba likolo tsa boahisane le botsamaisi ba sekolo, ba neng ba phuthehile ka bongata ho lakaletsa e mong oa litichere tsa sekolo e leng Monghali Mojalefa Mokhali tsela-tšoeu, haele mona a e-ea phomolong le ho abela barutoana ba ipabotseng mafapheng a fapakaneng likhau.
Barutoana ba abetsoe likhau mafapheng a kang a bolo ea maoto, papaling ea Volleyball le ba ipabotseng lithutong tsa bona tsa foromo ea bohlano(LGSC) ngoahola. E mong oa litichere tse seng li le phomolong, Mofumahali ‘Mamotšoane Mabula o qalile pele ka ho lebohela ntate Mokhali haele mona a e-ea phomolong a ntse a phetse hantle. A re tsena tsohle ha se ka bohlale ba hae, empa ke ka mohau le lerato la Morena Molimo. A re ho ea phomolong ha se ntho e ncha, e bile ka nako e ‘ngoe a ka ba a hopola hore o liehile ho ea phomola.
A mo khothaletsa boikopanyo le ho kena mokhatlo oo ba o thehileng e le litichere tsa sekolo sa Christ the King, tse seng li le phomolong oa ho ntlafatsa bophelo ba bona. “Re ntse re joetsa ba bang ba tla ea phomolong hore ha rea lahlana ka lebaka la lerato leo re ileng ra le fumana sekolong sena.” A rialo a bile a phethela ka ho ipiletsa ho litichere tsa sekolo sa Christ the King ho boloka lerato le monate o teng sekolong sena.
Mookameli oa Sekolo sa Christ the King, Monghali Makhaola Albert Serake o thoholelitse le ho leboha ntate Mokhali ka seabo sa hae se matla kholong le khulisong ea barutoana le sekolo sena. A supa hore ba ithutile tse ngata tsa bohlokoa ho eena. “Ntate Mokhali ke motho ea nang le sebopeho se setle, ho latela pelo ea hae, lerato le sepheo sa hae. Rea o lebohela ‘me rea thaba haele mona Morena Molimo a ile a u fa matla le sebaka sa hore re tlil’o tla re thaba le oena.” O boletse joalo a bile a leboha bohle ba bileng teng le bohle ba kentseng letsoho kholisong ea sekolo.
H’a tšetleha puo moketeng ona, seepa-pitso Monghali Mojalefa Mokhali o lebohile bookameli ba sekolo ‘moho le litichere ka tšebelisano ‘moho e mofuthu eo a bileng le eona le bona. A re har’a lintho tse ngata tseo a li ratileng ke bonngoe le tšebelisano ‘moho e teng lipakang tsa litichere tsa sekolo, kaha sena se tlisitse litholoana tse monate. “E se eka le bona bashanyana bana ba ka utloisisa seo re lekang ho ba fa sona, hobane re morerong oa ho fetola bophelo ba bona, e le hore e tle e be banna ba bohlokoa ba kamoso.” A ba kopa ho ithuta ka matla, ho mamela le ho hlompha litichere le bookameli ba sekolo.
