Matlama e phatlalatsa libapali

Botsamaisi bo bocha ba sehlopha sa bolo ea maoto sa Matlama bo phatlalalitse mabitso a libapali tse ncha tsa sehlopha mafelong a beke a tsoa feta, ‘me har’a mabitso a macha a libapali ho hlahelletse sebapali sa mehleng sa sehlopha sa bolo ea maoto sa Bantu ‘A Matšo Matebele’, ebile e le ‘mapala-hare ea kotsi haholo, Tsietsi Khooa ea tekenetseng konteraka ea lilemo tse peli le sehlopha sa  Matlama.

Ho ea ka Raliphatlalatso e mocha oa sehlopha sa Matlama Themba Ratalane, khalala ena ea bolo ea maoto e kileng ea jaba-jaba sehlopeng sa Chippa United naheng ea Afrika Boroa, ‘me o se a qalile ho ikoetlisa le sehlopha sena sa Lekoishining. Ratalane o boetse a supa hore botsamaisi ba Matlama bo matlafalitse sehlopha sa bona ka libapali tse latelang, Hlomohang Metsing ho tsoa sehlopheng sa LCS ‘Masheshena’ e le mohlaba-lintlha ea hloahloa ka konteraka ea selemo, Ntsimane Matsie ho tsoa ho Lijabatho ka konteraka ea lilemo tse peli, Tšepiso Rapotsane e  le sethibathibane ho tsoa sehlopheng sa Liphakoe le Poloko Ramarikhoana ka konteraka ea lilemo tse peli.

O re haele libapali tse ekelelitsoeng likonteraka, ke Nkopane Tlali ka lilemo tse tharo le Phafa Tšosane ka selemo. Athe bao ho alimanoeng ka bona ke Molefe Moiketsi ea ileng sehlopheng se tsoa kena liking e kholo ea Ace Maseru le Rethabile Moroeng ea ileng sehlopheng sa Lijabatho ea Morija.

A tiisa hore tekeno ea libapali ha e-s’o fele, ke hona ba sa ntseng ba tsoile letšolo ho imatlafatsa ka ho tsoma libapali nakong ena eo lihlopha tse kholo li sa ntseng li lumelletsoe ho eketsa kapa ho fokotsa lenane la libapali tsa tsona. A re ba tlilo etsa sohle se matleng a bona ho thusa mokoetlisi Halemakale Mahlaha ka libapali tsohle tseo a li hlokang kaha thomo ea hae hara tse ling e le ho hapa liki, ha selemo se secha sa lipapali se qala monongoaha.

A qetella ka hore botsamaisi ba sehlopha sa Matlama ‘Tse Putsoa’, bo ipapisitse le melao le melaoana e tsamaisang sehlopha, bo fihletse qeto ea ho khetha Adv. Teboho Tlebere ho ba moeletsi oa komiti e tsoa khethoa ea sehlopha sa Matlama.