Mojaki o qhaneha pere

Mokhothaletsuoa oa Sethala sa Kholiso ea Moruo (RFP), Lekhotleng la Puso ea Libaka la Mohlakeng A05, Monghali Sam Mojaki o ipilelitse ho sechaba sohle sa Thota-Moli, ho mo fa menoana ea bona ka letsatsi la likhetho tse akaretsang tsa makanselara a Makhotla a Puso ea Libaka, tse tlil’o tšoaroa ka la 29 Loetse monongoaha.

Puisanong le ba Moeletsi oa Basotho Ha Sekepe ka la 24 Phupu 2023, Monghali Mojaki o re o tlil’o khothaletsa sechaba sa Mohlakeng A05 boikopanyo, mafapheng a fapakaneng a bophelo, ekaba ke boikopanyo ntlheng ea temo, lipapali, leruo la likolobe le likhoho. O re ha ba se ba ikopantse linthong tsena, ho tlilo ba bobebe haholo hore ba fumane lithuso molemong oa ho holisa tlhahiso ea bona.

Mojaki o re h’a ka khethoa ke sechaba sa Mohlakeng A05 o tlil’o etsa hore sechaba ka boikopanyo le ka bonngoe se itahlele ka matla temong kaha e le eona mokokotlo oa naha. “Re ntse re etsa kanetso ea lijo kaha ‘muso oa habo rona o eme ka matla ho bona hore naha ea Lesotho e’a iphepa. Re tlil’o fetola temo-khoebo e seng ho lemela ho ja feela, hobane morero ke hore re tsebe ho iphelisa ka temo.” O boletse joalo a bile a eketsa ka hore haele ntlheng ea lipapali teng ke karolo e ‘ngoe eo a neng a se a ntse a e etsa, ea ho holisa le ho matlafatsa litalenta tsa bacha ba lebatooa la Koro-Koro.

A re lipapali li thusa bacha ho qoba litlolo tsa molao le ho ba hleka literateng, empa lekhetlong lena o tlilo thusa bacha ho sibolla litalenta tse ncha, e le hore ba tsebe ho iphelisa ka tsona. Potsong ea hore na ebe merero ena e meholo hakana, e hlokang lichelete tse boima ebe o tla be a nkile lichelete hokae? O itse joalokaha e le mohoebi, o na le metsoalle e ngata ea bahoebi bao a tlang ho kopa lithuso ho bona ho atlehisa merero ena hang ha sechaba se qeta ho mo khetha.

A phethela ka hore o lakatsa hore sechaba sa Thota-Moli se mo fe livoutu tsa sona ka la 29 Loetse monongoaha hobane o batla ho ntlafatsa motse oa Ha Sekepe kaofela, ka tšebelisano ‘moho le bona. A re mamati a butsoe ka linako tsohle esita le ka morao ho likhetho, ho nka maikutlo ohle a matle le ho shebisana le sechaba molemong oa katlehiso ea merero eohle e metle ea sona.