Tšeliso Thakholi Kamphani ea Metsi le Likhoerekhoere (WASCO), e fane ka lengolo la kopo ea nyollo ea litšebeletso tsa litheko tsa metsi ho Lekhotla la Taolo ea Motlakase le Metsi Lesotho (LEWA), ka 14.8% le litefiso tsa khoeli le khoeli ka 4.7%, ho basebelisi bohle ba metsi.
Ho latela phatlalatso e ntšitsoeng ke WASCO, kopo ena ea nyollo ea litefiso tsa litšebeletso tsa metsi, e se ke ea kenyeletsa litefiso tsa khoeli le khoeli tsa basebelisi ba metsi a lipompo tsa sechaba le basebelisi ba metsi a mokhahlelo oa pele (Band A Customers). Kopo ea e boetse e kenyeletsa le ho nyolloa ha litefiso tsa litšebeletso tsa likhoerekhoere ka 31.5%.
Phatlalatso e supa hore ka kakaretso WASCO e kopile chelete e kaalo ka M298.835Millione, e leng M251.425Millione sebakeng sa litšebeletso tsa metsi le M4.7Millione sebakeng sa likhoerekhoere. Ho feta mona, WASCO e boetse e kopile ho nyolla litefiso tsa ho hokela metsi hore li lekanngoe le litjeo tseo koparasi e kenang ho tsona ha e hokella baji metsi.
Ho sa le joalo, ho latela temana ea 24(6) ea molao oa LEA oa 2002, o hlomathisitsoeng, LEWA e entse khoeheletso ho basebelisi ba litšebeletso tsa metsi le khoerekhoere le batho bohle ba amehang ho fana ka maikutlo mabapi le kopo ena.
