Tšeliso Thakholi Kamor’a hore Sepolesa sa Lesotho se khine phano ea litšebeletso tsa likopo tsa mangolo a lithunya ngoahola, ka morero oa ho hlahloba lithunya tse seng molaong kahar’a naha, se phatlalalitse hore likopo tsa mangolo a ho ba le lithunya e boetse e butsoe hapa ho ipapisitsoe le lipehelo tse fanoeng.
Ho ea ka phatlalatso ena, Mohlahlami oa Raliphatlatso oa Sepolesa sa Lesotho, Insp. ‘Mareabetsoe Mofoka o boletse hore ke sepolesa feela se fuoeng boikarabello ba ho fana ka mangolo a tumello ea hore Mosotho ka mong a ka ba le sethunya, ‘me batho bao ke bao lipehelo li lumellanang le bona.
A re ho etsa kopo ea ho ba le sethunya ho lebeletsoe hore motho a ikamahanye le lintlha tse latelang: ebe motho ea lilemo li 25, a be a e-na le linku kapa lipoli tse 100, a e-na le likoloi tse tharo tsa boleng ba chelete e kaalo ka M300,000.00. Ho feta mona e be mohoebi ea sebeletsang moahong o bonahalang, mohoebi eo likhoebo tsa hae li etsang chelete e ka alo ka M4,000.00 ka letsatsi. Ka holimo ho tsohle e be mohoebi eo khoebo ea hae e nang le moaho kapa matlotlo a tšoarehang.
