Mabeoana a rapella Rabasotho

Bakriste ba ‘mishone oa St. Louis, Matsieng ba ile ba tšoarela Motlotlehi Letsie III, tšebeletso e kholo ea Sehlabelo se Halalelang sa ‘Missa ka sepheo sa ho mo lakaletsa katleho le mahlohonolo, haele mona a keteka lilemo tse 60 tsa tsoalo le ho tšoaea jubilee ea lilemo tse 25 a le teroneng. Tšebeletso ena e bile hona ‘mishoneng oa St. Louis letsatsi pele ho mokete oa hae o moholo ka la 16 Phupu monongoaha.

H’a fana ka khothatso ‘misseng ona, Mobabatsehi Gerard Lerotholi OMI, o boletse hore mangolo a Halalelang a baliloeng a bua ka lintlha tse tharo e leng tseo re li ketekang eleng khotso, pula le nala, empa le teng re ke ke ra keteka lintho tseo tse tharo re siea bophelo le lerato hobane ha bo hloka lerato ke ba litsietsi le mahloko. Mobabatsehi a bontša hore Rabasotho o fuoe mpho e kholo e leng bophelo, ka hona ba mo lakaletsa ho ba le bophelo bo botle bo nang le lerato.

Molula-Setulo oa LCBC, Mobishopo Augustinus Bane OMI h’a fana ka puo e bulang litšebeletso tsena, o bontšitse hore ba mona ho tla rapella Motlotlehi Letsie III haele mona a le lilemo li 60, kaha a hloka tlatsetso le matlafatso ea Morena Molimo hobane bohle re tseba boikarabello bo boima bo behiloeng mahetleng a hae. A re ba boetse ba mona ho tla mo kopela tataiso boetapeleng ba hae naheng ena ea habo rona ea Lesotho. “Re tlil’o mo khothatsa hore boetapeleng le bosebeletsing ba naha ena, a bue ka sebete le ka phatla e phahameng, a re: nka etsa tsohle ka Kriste ea mphang matla.” A rialo.

Kamorao ho mona o ile a bala lengolo la litakaletso tsa mahlohonolo, leo Mopapa Francis a le ngoletseng  Motlotlehi Letsie III haele mona a keteka lilemo tse 60 tsa tsoalo le ho mo kopela matla a ho tsoelapele ho busa sechaba sa Basotho.

Lebitsong la lelapa, Morena Seeiso Bereng Seeiso o lebohile Morena Molimo ka bophelo ba Rabasotho ‘moho le lelapa la hae. A re ba motlotlo haholo ka eena, ‘me ba boetse ba mo kopela tlhohonolofatso e tsoang ho Morena Molimo. Ka thoko ho mona sechaba sa Mabeoana se boetse sa etsa menyakoe lipina le lipapali tse fapakaneng  ho tlotlisa mokete oa Rabasotho.