Tšeliso Thakholi Moprista ea neng a sebetsa Parishing ea St. Peter’s Boikhutsong Tikolohong ea Klerksdorp, Afrika Boroa e bile e le letsoalloa la St. Paul Butha-Buthe tikolohong ea Leribe, Fr. Adrian T’soaeli Lelimo o bolokiloe St. Monicas Leribe, ka Moqebelo oa la 9 Phupu monongoaha.
Khothatsong ea hae Sehlabelong se Halalelang sa ‘Missa Mobishopo oa tikoloho ea Leribe Mohlomphehi Augustinus Tumahole Bane o itse Fr. Adrian Tšoaeli Lelimo ha a ne a tlotsetsoa Boprista bo Halalelang o buile mantsoe ana:
“U nketselitse ‘mele, oa mpha bophelo, keha ke re bona ke ‘Na eo ke tla ho Molimo ho phetha thato ea hae.”
O re Jesu Kriste eo a neng a mo bitsitse eo hajoale a mo bilelitseng hae, o re le se ke la thaba ka lebaka la meea e mebe e laeloang ke lona le mpe le thabe hobane mabitso a lona a ngotsoe leholimong, ho latela Testamente e Nchale ho ananela Boprista bo hlonngoeng ke Jesu Kriste. O re moprista ke motho ea buang joaloka Jesu o re: moea oa Morena o ho ‘Na ‘me o nthometse ho tlisetsa bafumanehi litaba tse monate, ho phatlalatsa mohau oa Morena.
A re Moprista ke motho eo mohla a neng a behoa a ile a tlotsuoa ka oli e halalelang ho thoe ho eena, Morena Jesu Kriste eo Molimo ntate a mo tlotsitseng ka Moea o Halalelang a ke a u boloke u tl’o halaletse sechaba sa bakriste, ‘me u nyehele sehlabelo lebitsong la sechaba sa Morena Molimo, ke Kriste oa mehleng eo re phelang ho eona, ‘moelanyi oa Molimo le batho. O tsoetsepele ka hore motho enoa oa nama le mali ea ronngoeng ke Molimo ho batho ba nama le mali o bohlokoa le teng ke khalase kapa lona lefisoana oa pshatleha, joale bothata ke hore o pshatleha joalo ka tlholeho kapa ka letsoho la ngoana motho, ‘me ho tla nyolosetsa ho morumuoa oa Molimo ho phetha thato le thomo ea Molimo, o tla kopana le mathata a kang a Moshe le Baprofeta ba Testamenteng ea khale, ka ho khetholoha a teane le mathata a tšoana le ao Jesu a fetileng ho oona.
A phethela ka hore Jesu o laile Baprista ba hae ba Testamete e Ncha ka hore ha ba atlehile ho folisa batho ba lelekile meea e litšila sechaba se khotsofetse ka lona, le se ke la thabisoa ke katleho eo ka bo eona, empa le thabisoe ke hore mabitso a lona a ngotsoe leholimong ka mongolo oa khauta o sa hlakoheng,’me ba ikotle sefuba ka hore tsena tsohle ba li entse ka Kriste ea ba fang matla. Monghali Alphonse Ramokhele Lelimo ea buileng lebitsong la lelapa, o re ba ne ba ntse ba lebeletse tse kholo ka eena, kaha a ne a ntse a le tlaase lilemong.
A leboha bakriste le baprista ba tikoloho ea Klerksdorp Afrika Boroa ka tšebelisano ‘moho le ho ba lumella ho boloka masapo a Fr. Lelimo Naheng ea Lesotho, a boela a leboha Mobishopo oa tikoloho ea Mohlomphehi Augustinus Tumahole Bane ka t’sehetso eo ba faneng ka eona ele tikoloho ea Leribe, ho tsamaisana leeto lena le bona e le lelapa la Lelimo ho fihlela qetellong. Moprista oa tikoloho ea Leribe Fr. Maine Meshack Phenethi ea buileng lebitsong la baprista, baitlami le matsoalloa a Parishe ea St. Paul ButhaButhe o re ka lebaka le tsela eo Fr. Lelimo a tsamaileng kaeona, bohle ba se ke ba fereka na hobane Morena Jesu Kriste Evangeling ea Johannes 14:1, o re le se ke la ferekana le mpe le lumele hobane moo tumelo e leng teng ha ho pherekano, ho sa tsotellehe qholotso kapa maemo ao le leng ka hare ho oona, le teng leha eba litaba tsena li etsahetse ka letsoho la ngoana motho le teng ha ho moo Molimo a itseng ha re bitsa, re mo thuse empa ke eena ea bitsang, ea iketsetsang lintho. A qetella ka hore bona e le matsoalloa a St. Paul ba ne a lebeletse hore ke eena (Fr. Lelimo) ea tl’o boloka baholoane ba hae eseng bona ba mo boloke.
Lebitsong la Liboka tsa LCBC le SACBC Mobishopo oa Tikoloho ea Mohale’s Hoek Mohlomphehi John Joale Tlhomola SCP o re LCBC le SACBC ke ntho e le ‘ngoe hobane ba kopanngoa ke Fr. Adrian Tšoaeli Lelimo. O re joaloka haele qholotso ea ntate ea Haalelang Mopapa Francis hore re ‘ne re lekole le ho sheba bonngoe ba Kereke ka hore re Kereke e tsamaeang ha ‘moho le monga eona Jesu Kriste, eena eo a ileng a re ho ba bang bao a neng a ba araba. Phokojoe li na le mekoti, linonyana tsa leholimo tsona li na le lihlaha moo li behelang teng, empa haele mora motho eena ha ho na moo a samelang hlooho ea hae teng.
Ke seo ntate Lelimo a ileng a ikabela sona, ‘me ke eona thomo ea rona re le baprista, ‘me o entse mosebetsi oa thomo ea hae ka moo ba utloileng ka teng. A qetella ka mantsoe a Ntate ea Halalelang Mopapa Francis ha a re lifate ha li je litholoana tsa sona, linoka ha li noe metsi a tsona le letsatsi ha le ichabele bo lona, empa ho nepahetse ho rata hobane ke karolo ea tlholeho, le teng ho nepahetse ho thaba empa ke ntho e kholo haholo ha ba bang ba thaba ka lebaka la hao.
