Mookameli e Moholo oa Kopano ea Maoblata a Maria ea se nang Sekoli lefatšeng, Ntate Louis Lougen OMI o butse ka molao le ho hlohonolofatsa moaho o mocha oa Khatiso ea Libuka Mazenod, tšebeletsong e neng e tšoaretsoe mabaleng a Setsi sa Thekiso ea Libuka, Mazenod, ka la 9 Phupu monongoaha.

Tšebeletso ena e ile ea simolla ka Sehlabelo se Halalelang sa ‘Missa, o neng o eteletsoe pele ke Mobishopo oa Tikoloho ea Qacha’s Nek, Mohlomphehi Joseph Sephamola OMI a tlatsitsoe ke Mobabatsehi Tlali Gerard Lerotholi OMI, Moemeli oa Maoblata Tikolohong ea Afrika-Madagascar Ntate Guillaume Muthunda OMI, oa Ntate Mothusi Sidney Boatile OMI, baprista ba bangata le modiakone a le mong. H’a fana ka khothatso, tšebeletsong eo Mobabatsehi Tlali Gerard Lerotholi OMI o bontšitse hore kajeno ke letsatsi le leholo leo ka lona, ba tlil’o leboha Morena Molimo ea matla ohle, ka ho ba fa matla a hore ebe Khatiso ea Mazenod e neng e putlame ka lebaka la ho chesoa ke mollo, ebe e phahame lithakong tseo e neng e le ho tsona. A bapisa teboho ena ea moaho o mocha oa Khatiso ea libuka le litaba tsa Mopesalema ha a re;

“Morena ha u ka tsosa marako a Jerusalema, re tle re boelloe ke thabo. Hoja u ka tsosa marako a neng a se a le teng mona Mazenod, e le hore re tle re boelloe ke thabo.”

O itse ho cha ha Mazenod ho ne ho hlile homo hlokisa khotso le botsitso, h’a ntse a hopola mohla letsatsi leo ho neng ho che ka lona.

“Lesatsing leo re ne re bile re tšaba le ho shebana mahlong, re tsoa mona re inamisitse lihlooho, empa kajeno Morena o re etselitse tse kholo, e bile re li thabetse.”

A bontša hore letsatsing leo ba ne ba lla bale meokho, empa kajeno Morena o hlakotse meokho ea bona, ‘me ba leboha Morena Molimo ea ba fileng kamphani hore e boele e tsohe bocha. A re liketsahalo tsena tse bohloko tsa ho cha ha Mazenod ha lia ka tsa ama kamphani feela, empa le bophelo ba batho.A tsoela pele ka hore bophelong ho na le nako ea ho lla le nako ea thabo, ‘me ho bile joalo mona moo ba leng teng, e leng seo ba se ketekelang thapelong ena ea teboho ea Eukariste e Halalelang, e leng eona e ba fang moelelo o nepahetseng oa hore ke thapelo ea teboho.

“Molimo a bokoe ka tseo a ntseng a li etsetsa bana ba batho, le hobane ona le bona ka mehla matšoenyehong a bona. Ke lena letsatsi le e ntseong ke Morena ha re thabeng, ‘me re nyakalleng ka lona.”

Ke Mobabatsehi eo. Mookameli oa Khatiso ea Mazenod, Ntate Augustinus Khakhane OMI h’a lokolisa sepheo sa mokete le ho amohela baeti o itse taba kholo e ba kopantseng ke ho tla leboha Morena Molimo, ka tse kholo tseo a ba etselitseng tsona. A re e ne e le ka la 27 Phupjane 2020, ha sebaka sena se apareloa ke leru le letšo la mosi le lelakabe, eba ho cha ntho e ‘ngoe le e ‘ngoe e neng e le kahare ho moaho oa thekiso ea libuka, ‘me le moaho kaofela ha ona o putlama fatše ka marulelo ho chele ntho eohle.

O bula moaho

Are kamorao ho ketsahalo ena e neng e sisimosa pelo ha bohloko, o ile a fihleloa ke toro ea hore moaho ona o boele o nyolohe bocha, empa ka sebopeho se seng se sa tšoane le maoba le maobane. A re toro eo ea hae e ile ea phethahala, kaha kajeno moaho ona o se o e-na le mekato e ‘meli, e leng kaholimo le ka tlaase.

A thetha puo ea hae ka ho leboha Mookameli oa Kopano ea Maoblata a Maria ea emotsoeng a se na Sekoli, Ntate Sidney Boatile OMI, babishopo ba Lesotho, baitlami le sechaba sa Morena Molimo, empa ka ho khetholoha a leboha basebetsi bohle ba Mazenod bao e saleng ba mo tšehelitse maemong ana a boima a tlokotsi le ho fihlela kajeno, a lerato le tšehetso eo ba mo bontšitseng eona.A ipiletsa ho bona hore ba tsoelepele ho bontša lerato leo ba ileng ba le bontša ho eena. A re joaloka moitlami ea ka ‘nang a rongoa ke mookameli oa hae, kae kapa kae empa basebetsi ba tle ba sale ba hlokometse le ho baballa kamphani ena ho bona hore e’a phela.

Lebitsong la basebetsi ba kamphani ea Mazenod, Mofumahali ‘Mamohapi Ramabolu o ile a bua ka liqholotso tse boima tse ileng tsa ama bophelo ba kamphani. O re qholotso ea pele ebile seoa sa COVID-19, e ileng ea khina tšebetso ea kamphani le likamphani tse ling, kaha ho ile ha khinoa motsamao kahare le kantle ho naha, ka hona haeba thata ho kamphani hore e ka tseba ho phela. A re ha ba ntse ba hloletsoe ke seoa sena, ho ile ha hlaha koluoa ea mollo o ileng oa rinya sohle kahara moaho thekiso ‘me thepa eohle eo e neng ba e rekiloe ho bareki e-so rekoe e ile ea chella ka moo, e leng sona se entseng hore ba kooafale. Leha ho le joalo, a leboha bohle ba ileng ba kenya letsoho le toma hore ebe kamphani e ‘ne e phele.

Ho feta mona, a kopela kamphani ea Mazenod mohau ho ba pusong hoba hopola, ha ho ntse ho fanoa ka mesebetsi e kenyang chelete likhoebong, kaha kamphani ea Mazenod e bapetse karolo e kholo ntlheng ea toantšo ea mesebetsi. A re basebetsi ba eona ba lefa lekhetho ho kenya letsoho kholisong ea moruo. A phethela ka leboha mookameli oa kamphani ka sebete seo a bileng le sona, linakong tse thata tsa bophelo ba eona. A re basebetsi ba tšepisitse hore ba tlil’o tsoelapele ho sebeletsa kamphani ena ka thata le ka boitelo.

H’a fana ka puo ea teboho, Mookameli oa Maoblata Ntate Mothusi Sidney Boatile OMI o itse o leboha batho bohle ka tlhahlamano ea bona ka tsohle tseo ba li entseng ho tloha ha kamphani ea Mazenod e ne e ntse e sebetsa hantle le ho fihlela hajoale. A leboha bohle ba teng ba kentseng letsoho katlehisong ea mokete ona ka mekhoa e fapakaneng. A etsa boipiletso ho bohle hore ha ba bona moaho ona o mocha, ba tle ba se ke ba nka eka Maoblata a na le chelete kapa eona kamphani. “Ha ho joalo. Rona re ntse re tsoelapele re le bo-Ntate ka ho iphelela ka bofumanehi le ho hloka.” A rialo a boetse a hlokomelisa sechaba sa Morena Molimo hore lithuso tsohle tse tsoang ho bona ba ntse ba li hloka, ho etsa e meng ea mesebetsi ea Kereke e mengata e fapakaneng, e le ho nanabeletsa letsoho ho thusa mafutsana.