Nthabeleng Seitlheko ‘Musi oa Setereke sa Qacha‘s Nek Habofanoe Paul Pheku, o re o tšoentsoe ke litlaleho tse holimo tsa tlhekefetso ka motabo, e leng se theolang setereke sa habo seriti. O boletse tsena puisanong le Koranta ka la 12 Pherekhong monongoaha.
O supile ha litaba tsena li bakoa ke lisebelisoa tse ngata joaloka tai, lithetefatsi, ho hloka tsebo le thuto e pharaletseng ka litaba tsena le Litokelo tsa Mantlha tsa Botho. E ‘ngoe hape o re e kenyeletsa tsela ea kholiso ea bashanyana kahar’a metse kaha ba etsa lintho ka tloaelo.
A re ho boetse ho na le bothata ba bashanyana le banna ba nyalang bana ba tlaase lilemong, ba sa hlokomele hore taba eo ke tlolo ea molao, eo nakong e tlalehoang e leng hona motho a hlokomelang.
Ha joale le malapa a mangata a sitoa ho utloisisa hore manyalo a mofuta oo ke tlolo ea molao kaha le bona ba nyetsoe ka tsela ea chobeliso ebile ba le banyenyane. O re taba ena e tlisa mathata a mangata bophelong ba bacha ba setereke sena kaha bana ba iphumana ba etsa bana, ba bang ha ba tlalehe litaba tsena hobane ba se na tsebo, ha ba bang tsebo e le teng ba sitoa ho finyella libakeng tseo ba ka thusoang ho tsona ka lebaka la bohloki.
O re leha mekhatlo e ikemetseng e ile ea tsoa letšolo ho fana ka thuto sechabeng ka litaba tsena le tsa Litokelo tsa Mantlha tsa Botho, ho bonahala litaba tseo li oela litsebeng tse sa utloeng hobane maqalong a selemo sa 2025 feela ho tlalehiloe litaba tsa peto ka lipalo tse holimo.
A re boholo ba liketso tsena li etsahala bosiu, ebile e le bashanyana ba tlase lilemong ba itlhalosang e se e le banna kamor’a ho khutla lebollong. A re ekare babolli ka bo-bona ba ka fana ka thuto ho bacha bana kaha ho senyeha bokamoso ba bona, ‘me ke boikarabello ba bona hore bashanyana bana kamor’a ho bolla ba ba khothaletsa ho phelisana le sechaba, ho ba le lentsoe le ho ananela hore ba lokela ho ikobela molao.
Ho hlola qholotso ena, o re ofisi ea habo ‘moho le Sepolesa sa Lesotho, ba tla boela ba potoloha le metse ho tšoarela sechaba lipitso molemong oa ho thophothetsa kutloisiso, ho kenya lerato la sekolo ho bana ba bashanyana kaha le bona ba se nyahlatsa kapele. A ipiletsa ho mekhatlo e ikemetseng ea sechaba ho ema le bona nakong ena e thata kaha ho le bohlokoa hore setereke seo le bacha ba teng ba ntlafale.
Ho sa le joalo, Mookameli oa Lefapha la Tšireletso ea Bana Mookho Motheo, o hlalositse hore ho na le sethethefatsi se sebelisoang ke bana le mofuta oa tai o fumanehang sebakeng se seng hona seterekeng seo, se susumetsang batho ho etsa liketso tsena. A re leha ho le joalo ofisi ea habo e tšoere ka thata ho bona hore na e tla fana ka thuto joang molemong oa bophelo bo botle ba sechaba.
Mokhatlo oa Mokhosi oa ‘MA Ngoana o thehiloeng ka selemo sa 2023, o khothaletsa haholo hore sechaba se tlalehele sepolesa libaka tseo ho rekisoang lithetefatsi, kaha e le karolo e etsang hore bana ba tsoe taolong. Mokhatlo ona o tšoere ka matla ho bona hore thuto e anela sechabeng ka litsela tsohle, ho kenyeletsa litaba tsa tlhekefetso, lithetefatsi le boiketlo ba basali le bana.
