Moeletsi oa Basotho Sehopotso sa Francis oa Sales ea Halalelang, Mobishopo le Moruti oa Kereke
Labohlano
Ho baloa Bukeng ea Siraka. (39:8-14)
“O tla tlala moea oa kutloisiso.”
Ha eba e le thato ea Morena ea matla-‘ohle o tla tlala moea oa kutloisiso. Mantsoe a tletseng bohlale a tla betseha ho eena, a lebohe Morena ka thapelo.
O tla ba le merero le tsebo e nepahetseng, a inahane ka tse patehileng tsa Morena. O tla totobatsa thuto eo a e fumaneng, a ithorise ka molao oa Selekane sa Morena.
Ba bangata ba tla rorisa bohlale ba hae, bo sa tl’o lebaleha le ka mohla. Lebitso la hae ha le tl’o nyamela, empa le tla ‘ne le hopoloe ka meloko le meloko. Lichaba li tla lokolisa bohlale ba hae, le phutheho e bolele lithoko tsa hae.
PESALEMA 118
NTHUTE THATO EA HAU, MORENA.
E mocha o tla boloka joang tsela ea hae e hloekile?
ka ho ela lipolelo tsa hau hloko.
Ke u batla ka pelo eohle ea ka,
se ntumelle ho kheloha melao ea hau.
Ka pelong ea ka ke phuthetse pallo ea hau,
e se re ka u fosetsa.
U bokoe Morena!
Nthute thato ea hau.
Leleme la ka le lokolisa
likahlolo tsohle tse tsoang molomong oa hau.
Ke thabela tsela ea litemoso tsa hau
ho feta maruo ‘ohle.
Ho baloa Evangeling e halalelang e ngotsoeng ke Matheus. (5:13-16)
“Lona le leseli la lefatše.”
Ka nako eo, Jesu a re ho barutuoa ba hae: Lona le letsoai la lefatše; empa ha eba letsoai le ka tapa, lona le ka nokoa ka’ng? Ha le sa na thuso, ha e se hore le lahleloe kantle, le hatakeloe ke batho.
Lona le leseli la lefatše. Motse o sitoa ho pateha o le holim’a thaba. Le lona lebone, ha le ke le hotetsoa le behoe tlas’a nkho, empa le hlongoa sehlomellong sa lona, hore le tle le khantšetse bohle ba ka tlung. Leseli la lona le khanye joalo pel’a batho, e le hore ka ho bona liketso tse lokileng tsa lona, ba tle ba tlotlise Ntat’a lona ea maholimong.
