La 22 Pherekhong 2025

Beke ea 2 har’a selemo

Laboraro

Ho baloa Lengolong ho Ba-Heberu. (7:1-3.15-17)

“U moprista ka bosafeleng oa mofuta oa Melkisedeke.”

Bana beso! Melkisedeke e ne e le morena oa Salema le moprista oa Molimo ea holimo-limo. Ha Abrahama a khutla ntoeng eo ho eona a neng a bolaile marena, Melkisedeke a mo khahlanyetsa, a ba a mo hlohonolofatsa. A aroleloa karolo ea leshome ea lintho tsohle ke Abrahama.

Ha ho hlalosoa lebitso la Melkisedeke, ke ho re morena oa toka; hape, e ne e le morena oa Salema, ke ho re morena oa khotso. Melkisedeke ke ea se nang ntat’ae, ea se nang ‘m’ae, ea se nang leloko, ea se nang qaleho ea nako ea bophelo ba hae leha e le qetello ea bona. O tšoana le Mor’a Molimo: ke moprista ka bosafeleng.

Hona ho totobetse le ho feta, ha ho hlaha moprista e mong ea tšoanang le Melkisedeke, ea behiloeng, e seng ho ea ka molao oa batho, empa e le ka matla a bophelo bo se nang ho fela. Hobane Mangolo a paka, a re: U moprista ka bosafeleng oa mofuta oa Melkisedeke.

PESALEMA 109

U MOPRISTA KA BOSAFELENG OA MOFUTA OA MELKISEDEKE.

Morena o itse ho Moren’a ka:

“Lula ka tsohong la ka le letona,

‘me ke tla etsa lira tsa hau

bonamelo ba maoto a hau.”

Morena o tla otlolla

lere la matla a hau4 a le Sione:

busa har’a lira tsa hau!

Bohosana ke ba hau

ho tloha tsatsing la tsoalo ea hau;

ke u tsoetse pele ho mafube,

lithabeng tse halalelang, u le joaloka phoka.

Morena o ikanne ‘me ha a na ho koeneha:

U moprista ka bosafeleng oa mofuta oa Melkisedeke.

Ho baloa Evangeling e halalelang e ngotsoeng ke Mareka. (3:1-6)

“Na, ka Sabbatha, ho lumeletsoe ho pholosa bophelo kapa ho bo timetsa?”

Ka nako eo, Jesu a boela a kena tlung ea thapelo. Ho no ho le teng moo motho ea shoeleng letsoho. Ba ne ba lisitse Jesu hore na o tla folisa ka sabbatha, e le hore ba tsebe ho mo qosa. Eaba o re ho motho ea shoeleng letsoho: Hlahella pontšeng. A nt’o re ho bona: Na, ka sabbatha, ho lumeletsoe ho etsa molemo kapa bobe, ho pholosa bophelo kapa ho bo timetsa?

Ba mpa ba khutsa. Eaba o ba hlaba ka mahlo a bohale, a soabisitsoe ke bofofu ba lipelo tsa bona, a re ho motho eo: Otlolla letsoho la hau.

A le otlolla ‘me letsoho la boela la phela. Joale Bafarisi ba tsoela kantle ‘me ba phakisa ba rera hammoho le Ba-Heroda mokhoa oa ho timetsa Jesu.