Moeletsi oa Basotho Beke ea 2 har’a selemo
‘Mantaha
Ho baloa Lengolong ho Ba-Heberu. (5:1-10)
“Leha e ne e le Mora oa Molimo, a ithuta mamelo ka mahloko a hae.”
Moprista ofe le ofe e moholo ea khethiloeng har’a batho, o behetsoe ho emela batho tšebeletsong ea Molimo a tle a hlahise linyehelo le mahlabelo bakeng la libe.
Ke ea ka hauhelang ba sa tsebeng le ba khelohileng tsela, hobane le eena o patisitsoe ke mefokolo; ‘me ka baka la eona, o tšoanetse ho nyehela mahlabelo bakeng la libe, e seng tsa sechaba feela, empa le bakeng la libe tsa hae. ‘Me ha ho ea ka inkelang kabelo ena e hlonephehang, ha e se ea bilelitsoeng ho eona ke Molimo, joaloka Aarone.
Ka mokhoa o joalo, le eena Kriste ha a ka a itlotlisa ka ho ipeha moprista e moholo, empa a behoa ke ea itseng ho eena: U Mora oa ka, kajeno ke u tsoetse; ‘me kamoo a bolelang kateng nqa e ‘ngoe hape, o re: U moprista ka bosafeleng, ka ho ea ka moetlo oa Melkisedeke.
Ha a ntse a phela lefatšeng, ka mohoo o moholo le ka meokho, Kriste o ile a hlahisa lithapelo le likopo tse matla ho ea ka mo pholosang lefung; a ba a mameloa ka baka la hlompho ea hae ho Molimo. ‘Me leha e ne e le Mora oa Molimo, a ithuta mamelo ka mahloko a hae.
Ha a se a fihletse phetheho, e bile mohloli oa pholoho e sa feleng ho bohle ba mo mamelang, kaha Molimo a ‘mitsitse moprista e moholo oa mofuta oa Melkisedeke.
PESALEMA 109
U MOPRISTA KA BOSAFELENG OA MOFUTA OA MELKISEDEKE.
Morena o itse ho Moren’a ka:
“Lula ka tsohong la ka le letona,
‘me ke tla etsa lira tsa hau
bonamelo ba maoto a hau.”
Morena o tla otlolla
lere la matla a hau a le Sione:
busa har’a lira tsa hao!
Bohosana ke ba hau
ho tloha tsatsing la tsoalo ea hau;
ke u tsoetse pele ho mafube,
lithabeng tse halalelang, u le joaloka phoka.
Morena o ikanne ‘me ha a na ho koeneha:
U moprista ka bosafeleng oa mofuta oa Melkisedeke.
Ho baloa Evangeling e halalelang e ngotsoeng ke Mareka. (2:18-22)
“Monyali o nts’a e-na le bona.”
Ka nako eo, barutuoa ba Joannes le Bafarisi ba ne ba itima lijo. Ke ha ho tla batho ba bang ho Jesu, ‘me ba re ho eena: Ke ka baka la’ng ha barutuoa ba Joannes le Bafarisi ba itima lijo, empa barutuoa ba hau bona ba sa itime?
Eaba Jesu o re ho bona: Ana baetsana ba ka itima lijo monyali a nts’a e-na le bona? Ha ba sa ntsane ba e-na le monyali ba ke ke ba itima; empa matsatsi a tla tla, ao ka ‘ona monyali a tla tlosoa ho bona, ‘me ke moo joale ba tla itima tsatsing leo.
Ha ho motho ea keng a rokelle setsiba sa lesela le lecha seaparong sa khale. Ha ho ka etsoa joalo, setsiba se secha se ka hlephola seaparo sa khale ‘me lesoba la eketseha.
Le teng ha ho motho ea keng a tšele veine e ncha makukeng a khale: ha ho ka etsoa joalo, veine e tla phatlola makuka, ebe veine le makuka lia senyeha. Empa veine e ncha e tšeloa makukeng a macha.
