Moeletsi oa Basotho Beke ea 30 har’a selemo
Labone
Ho baloa Lengolong la Moapostola Paulosi ho Ba-Efese (6,10-20)
“Inkeleng lihlomo tsohle tsa Molimo, le eme le tiile ho isa qetellong.”
Bana beso! Imatlafatseng ka matla a Morena a sa hloloeng ke letho. Tšoarang lihlomo tsohle tsa Molimo le tle le tsebe ho qhela maraba a diabolosi. Lira tseo re loanang le tsona ha se tsa nama le mali, empa ke Marena le Balaeli le Babusi ba lefatše lena la mafifi, ke hore meea e khopo e sebakeng. Ka baka leo, inkeleng lihlomo tsohle tsa Molimo, e le hore le tsebe ho setlela mohlang ho leng hobe, le eme le tiile ho isa qetellong.
Ha ho le joalo, ‘nete e be senyepa seo le itlamang matheka ka sona, tsoka e be seaparo sa lona sa bosole. Cheseho ea ho ruta Evangeli ea Khotso e be meqathatso ea maoto a lona. Tšoarang thebe ea Tumelo ka mehla, eo ka eona le ka timang metsu e hlenneng ea E mobe.
Roalang katiba ea tšireletso e pholosang. Tšoarang sabole ea moea e leng Lentsoe la Molimo.
Etsang joalo le ntse le rapela, le kopa thuso ea Molimo. Rapelang kamehla ka matla a Moea. Ka hoo le falimehe, le sa khaotse, ‘me le rapelle balumeli. Rapellang le ‘na hore ke nehoe ho bua ‘me ke bue ka sebete ho phatlalatsa sephiri sa Evangeli, eo ke leng leqosa la eona leha ke le litlamong. Le nthapelle hore ke be sebete ho e ruta, kamoo e leng tšoanelo ea ka kateng.
PESALEMA 143
HO BOKOE MORENA, EO E LENG LEFIKA LA KA.
Ho bokoe Morena, eo e leng lefika la ka,
ea koetliselitseng matsoho a ka ntoa
le menoana ea ka ho loana.
Ke eena mohauheli le qhobosheane ea ka,
lerako le nkhaheletsang le molopolli oa ka,
ke eena thebe ea ka eo ke itšireletsang ka eona,
ea behang lichaba tlas’a ka.
Molimo oa ka ke tla u binela sefela se secha,
ke tla u roka ka harepa e khoele li leshome,
uena ea nehang likhosi ho hlola,
uena ea pholosang mohlanka oa hau Davida.
Ho baloa Evangeling e halalelang e ngotsoeng ke Luka. (13,31-35)
“Ha se ntho e lokelang hore moprofeta a bolaeloe ka ntle ho Jerusalema.”
Ka nako eo, ba bang ba Bafarisi ba tla ho Jesu, ba re ho eena: Tsamaea, u tlohe mona, hobane Heroda o rata ho u bolaea. Jesu a ba araba, a re: E-eang, le bolelle phokojoe eo, le re: Ke leleka bademone ‘me ke etsa lipholiso kajeno le hosasane; ‘me ka letsatsi la boraro tsohle li tla phethahala ho ‘na. Empa e ka khona ke tsamaee kajeno le hosasane le ka moso, hobane ha se ntho e lokelang hore moprofeta a bolaeloe ka ntle ho Jerusalema.
Jerusalema, Jerusalema, uena ea bolaeang baprofeta, ea tlepetsang ka majoe ba romiloeng ho uena! Ke hangata hakakang ke ratileng ho bokella bana ba hau, joaloka ha khoho e bokella litsuonyana tsa eona tlas’a mapheo a eona empa u hanne! Joale le tla tlohelloa ntlo ea lona. Ke le bolella tsena, hobane ha le sa tla mpona ho be ho fihle nako eo ka eona le tla re: Ho bokoe ea tlang ka lebitso la Morena.
