Moeletsi oa Basotho Beke ea 28 hara selemo
‘Mantaha
Ho baloa Lengolong la Moapostola Paulosi ho Ba-Galata. (4,22-24.26-27.31-5,1)
“Ha re bana ba lekhoba, empa re bana ba mosali eo e seng lekhoba.”
Bana beso! Ho ngotsoe hore Abrahama a ba le bara ba babeli e mong ka mosali oa lekhoba, e mong ka eo e seng lekhoba. Empa mora oa lekhoba o tsoetsoe ka mokhoa oa tlhaho feela; athe mora oa eo e seng lekhoba a hlaha ka pallo.
Hona ke papiso: Basali bana ba babeli ba tšoantša lilekane tse peli. Se seng se tsoa thabeng ea Sinai ‘me se tsoala bana ba bokhoba; sena se tšoantšoa ka Agare.
Athe Jerusalema oa holimo ha se lekhoba, ‘me ke eena ‘m’a rona; hobane ho ngotsoe ho thoe: Nyakalla, uena nyopa, uena ea sa beleheng, luluetsa ke thabo, uena ea sa kang a tseba mahloko a pelehi; hobane bana ba ea lahliloeng ba bangata ho feta ba mosali ea nang le monna.
Ha ho le joalo, bana beso, ha re bana ba lekhoba, empa re bana ba mosali eo e seng lekhoba. Kriste o re lokolotse; re se re le batho ba nang le tokoloho. Ha ho le joalo, tiisetsang, ‘me le se ke la boela la kena tlas’a joko ea bokhoba.
PESALEMA 112
HO BOKOE LEBITSO LA MORENA KAMEHLA.
Lona bahlanka ba Morena, rorisang,
rorisang lebitso la Morena.
Ho bokoe lebitso la Morena,
họ tloha joale ho isa khale.
Ho tloha bochabela ho isa bophirima,
ho rorisoe lebitso la Morena.
Morena ke eena ea phahametseng lichaba tsohle,
letlotlo la hae le feta maholimo.
Ke mang ea joaloka Morena Molimo oa rona
ea lulang holimo-limo,
ea inamang ho sheba maholimo le lefatše,
ea ntšang mofutsana litholeng,
ea nyollang mohloki thotobolong.
Ho baloa Evangeling e halalelang e ngotsoeng ke Luka. (11,29-32)
“Moloko ona o ke ke oa nehoa pontšo, ha e se pontšo ea Jonase.”
Ka nako eo, ha matšoele a mathela ho Jesu, a qala ho bua, a re: Moloko ona ke moloko o mobe; o batla pontšo, empa o ke ke oa e nehoa, ha e se pontšo ea Jonase. Hobane joaloka ha Jonase e bile pontšo ho Ba-Ninive, le eena Mor’a motho e tla ba eona ho moloko ona.
Mohla kahlolo Mofumahali oa Boroa o tla qosana le batho ba moloko ona, ‘me o tla ba neoa; ka hobane o ne a tlohe pheletsong ea lefatše ho tla namela bohlale ba Salomone, empa ho teng mona ea fetang Salomone.
Mohla kahlolo batho ba Nínive ba tla qosana le moloko ona, ‘me ba tla o tsoa; ka hobane ba ile ba baka ka ba la thuto ea Jonase, empa ho teng mona ea fetang Jonase.
