La 13 Phupu 2024

Beke ea 14 har’a selemo

Labotšelela

Ho baloa Bukeng ea Moprofeta Isaia. (6, 1-8)

“Ke motho ea molomo o sa hloekang, empa ke bone Khosi, Morena oa Makhotla ka mahlo.”

Ka selemo sa lefu la khosi Ozia, ka bona Morena a lutse teroneng e phahameng haholo, liqola tsa seaparo sa hae li tlatsa Tempele. Bo-Serafime ba ne ba eme pel’a hae. E mong le e mong o n’a e-na le mapheo a tšeletseng: a mabeli ho ikhurumetsa sefahleho, a mabeli ho ikoahela maoto, a mabeli ho fofa. Ba ne ba hoeletsana, ba re: “Oa halalela, oa halalela, oa halalela, Morena oa makhotla. Lefatše lohle le tletse letlotlo la hae.”

Mahlakore a menyako a sisinyeha ke molumo oa mohoo oo, ‘me ntlo ea tlala mosi. Eaba ke re: Ke malimabe, ke shoele, hobane ke motho ea molomo o sa hloekang, ebile ke ahile har’a sechaba se melomo e sa hloekang, empa ke bone Khosi, Morena oa makhotla, ka mahlo.”

Ke ha e mong oa bo-Serafime a fofela ho ‘na, letsohong a tšoere leshala le hlenneng, leo a le okhileng ka letlao aletareng. A ama molomo oa ka ka lona, a re: “Ua bona, ka ha leshala lena le amme molomo oa hao, molato oa hao o hlakotsoe, sebe sa hao se tšoaretsoe.”

Ka nt’o utloa lentsoe la Morena le re: “Ke tla roma mang? Leqosa la ka e tla ba mang? Ka araba, ka re: “Ke ‘na enoa, nthome.”

PESALEMA 92 (1.2.5. R. 1)

MORENA KE KHOSI, O APERE BOTLOTLEHI

Morena ke khosi, o apere botlotlehi,

Morena o apere matla, o itlamme ka ‘ona thekeng.

Ka hoo lefatše le tiile,

le ke ke la sisinyeha.

Terone ea hao ha e sa le e tiile ho tloha tšimolohong

ho tloha khale u nts’u le teng.

Litemoso tsa hao li tsitsitse e le ka ‘nete,

khalalelo e khabisa ntlo ea hao Morena,

kamehla le mehla.

Ho baloa Evangeling e halalelang e ngotsoeng ke Matheus. (10, 24-33)

“Se tšabeng ba bolaeang ‘mele.”

Ka nako eo, Jesu a re ho baapostola ba hae: Morutuoa h’a fete moruti oa hae, le mohlanka h’a fete mong’a hae. Ho lekane ha morutuoa a tšoana le moruti oa hae le mohlanka a tšoana le mong’a hae. Ha esitana ba bitsitse mong’a ntlo Beelzebule, ba tla re’ng ka ba ntlo ea hae!

Ha ho le joalo, le se ke la ba tšaba; hobane ha ho letho le koahetsoeng le ke keng la koaholloa, leha e le le patehileng le ke keng la tsejoa. Seo ke le bolellang sona lefifing, le se bolele leseling; ‘me seo le se utloang le se nyenyeletsoa tsebeng, le se phatlalatse le le marulelong a matlo. Se tšabeng ba bolaeang ‘mele, empa ba sitoa ho bolaea moea; le mpe le tšabe Ea nang le matla a ho timetsa moea hammoho le ‘mele liheleng.

Ana lirobele tse peli ha li rekisoe sente na? Athe ho ke ke ha oela fatše leha se le seng ho tsona ntle le Ntat’a lona. Esita le liqoba tsa moriri oa hlooho tsa lona li baliloe kaofela. Ha ho le joalo, le se ke la tšoha: lona le ba bohlokoa ho feta lirobele tse ngata.

Ha ho le joalo, mang le mang ea tla mpaka pel’a batho, le ‘na ke tla mo paka pel’a Ntate ea maholimong. Athe mang le mang ea tla ntatola pel’a batho, le ‘na ke tla mo latola pel’a Ntate ea maholimong.