Moeletsi oa Basotho Labobeli
Ho baloa Lengolong la Moapostola Jakobo. (1,12-18)
“Molimo ha a leke motho le ea mong.”
Baratuoa! O lehlohonolo motho ea iphapanyang ka nako ea moleko, hobane ha a se a nontsoe, o tla fumana mofapahloho oa bophelo, oo Molimo a o baletseng ba mo ratang.
Ho se be eo, ereng ha a lekoa, a re o lekoa ke Molimo, hobane Molimo ha a angoe ke tse mpe, ‘me eena ha a leke motho le ea mong. Empa e mong le e mong oa huloa ‘me o huloa ke litakatso tsa hae. Joale takatso e mpe, ha e emere, e tsoala sebe, ‘me sebe ha se se se phethahetse, se tsoala lefu.
Le se ke la ea le khongoana holimo, bana beso ba ratehang. Neho eohle e ntle, mpho eohle e phethehileng e tsoa holimo, e theoha ho Ra-maseli, eo ho seng phetoho ea letho ho eena, leha e le se ka ho thekesela; hobane ke ka ho rata ha hae a re tsoetseng ka lentsoe la ‘nete, re tle re be joaloka lithaka-ngoaha har’a libopuoa tsa hae.
PESALEMA 93 (12-13.14-15.18-19. R. 12)
MORENA, HO LEHLOHONOLO MOTHO EA RUPELOANG KE UENA.
Morena, ho lehlohonolo motho ea rupeloang ke uena,
Eo u mo rutang ka Molao oa hao,
a tle a fumane phomolo matsatsing a mathata.
Efela Morena a ke ke a lahla sechaba sa hae,
a ke ke a furalla ba lefa la hae.
Ho tla boela ho ahloloa ka toka,
‘me bohle ba pelo li ntle ba tla e latela.
Eitse ha ke re: “Leoto la ka lea rerekela,”
mohau oa hao, Morena, oa ntšehetsa.
Ha pelo ea ka e tletse lipelaelo,
Matšeliso a hao a thabisa moea oa ka.
Ho baloa Evangeling e halalelang e ngotsoeng ke Mareka. (8,14-21) “Le tšabe tomoso ea Bafarisi le ea Heroda.”
Ka nako eo, barutuoa ba ne ba lebetse ho nka bohobe; ba ne ba e-na le bohobe bo le bong feela ka sekepaneng. Jesu a ba laea, a re: Hlokomelang, le ts’abe tomoso ea Bafarisi le tomoso ea Heroda. Eaba ba buisana, ba re: Ke hobane re se na mahobe.
Ha Jesu a lemoha hoo, a re ho bona: Ke’ng ha le buisana, le re ha le na mahobe? Ana ha le e-s’o elelloe, ha le e-s’o utloisise, pelo tsa lona li sa foufetse na? Le na le mahlo, ha le bone ke’ng? Le na le litsebe, ha le utloe ke’ng? Na ha le sa hopola, hore na, mohla ke ngoathelang batho ba likete tse hlano mahobe a mahlano, le ne le bokelle liroto tse kae tse tletseng marathana? Ba araba, ba re: Tse leshome le metso e ‘meli.
Le mohla ke ngoathelang ba likete tse ‘ne mahobe a supileng, le ne le bokelle liroto tse kae tsa marathana na? Ba araba, ba re: Tse supileng. Jesu a re ho bona: Le joale ha le e-s’o utloisise na?
