Moeletsi oa Basotho ‘Mantaha
Ho baloa Bukeng ea Pele ea Likhosi. (8,1-7.9-13)
Ha tlisoa areka sehalalelong sa lihalalelo, ntlo ea Morena ea tlala Ieru
Matsatsing ao, Salomone a bitsetsa Jesusalema baholo ba Israele, ‘moho le marena ‘ohle a meloko le mahosana a matlo a Israele, hore areka ea selekane sa Morena e latoe Sione, Motseng oa Davida. Banna bohle ba Israele ba phuthehela ho khosi Salomone, khoeling ea Ethanime, e leng khoeli ea bosupa, ka nako ea Mokete.
Eitse hoba baholo bohle ba Israele ba fihle, baprista ba jara areka: ba tlisa areka ea Morena ‘moho le Tente ea Kopano le thepa eohle e halalelang e ka tenteng. Khosi Salomone ‘moho le ba-lsraele bohle ba neng ba phuthehetse le eena pela areka, ba nyehela mahlabelo a likhutšoane le liphoofolo tse ling, tse se nang palo ke bongata ba tsona.
Baprista ba tlisa areka ea selekane sa Morena tulong tsa eona, sehalalelong sa Tempele, e leng sehalalelo sa lihalalelo, tlas’a mapheo a likerubime. Likerubime li ne li otlolletse mapheo a tsona holim’a moo areka e neng e le hona teng, mokhoa oo li neng li haelelitse areka le mesikaro ea eona ka oona.
Ho ne ho se letho ka arekeng, ha e se matlapa a mabeli, a neng a behoe kateng ke Moshe ha a le Horebe, e leng matlapa a Selekane seo Morena a neng a se hlabe le bana ba Israele, hoba ba tsoe naheng ea Egepeta.
Eitse hoba baprista ba tsoe sehalalelong, Ntlo ea Morena ea tlala leru, hoo baprista ba bileng ba sitoa ho ntšetsa pele tšebeletso ea bona ka baka la Ieru: hobane Ntlo ea Morena e n’e tletse letlotlo la Morena. Eaba Salomone o re: Morena o ratile ho aha ka har’a leru. Ke fela ke u ahetse ntlo eo u tla lula ho eona: Ke qalo eo u tla aha ho eona ka mehla.
PESALEMA 131 (6-10)
EMA, MORENA, U TLE QALONG EA PHOMOLO EA HAO.
Re o utloetse Efrata,
ra o fumana naheng ea Jaare.
A re e’o hlaha motlotloaneng oa hae,
re itiheleng fatše tlas’a bonamelo ba maoto a hae.
Ema, Morena, u tle qalong ea phomolo ea hao,
uena le areka ea matla a hao.
Ka baka la Davida, mohlanka oa hao,
u se ke ua nena sefahleho sa motlotsuoa oa hao.
Ho baloa Evangeling e halalelang e ngotsoeng ke Mareka. (6,53-56)
Bohle ba neng ba mo ama ba ne ba folisoa.
Ka nako eo, hoba Jesu le barutuoa ba hae ba tšelele mose, ba fihla Genesaretha, ‘me ba emisa lebopong. Ha ba tsoile sekepaneng, batho ba mo tseba hang, eaba ba phallela kahohle naheng ena, ‘me ba qala ho mo tlisetsa ka liphate ba kulang, moo ba mo utloelang a le teng.
Kae le kae, moo a neng a kena teng, metseng, metsaneng, le naheng, ba ne ba bea bakuli mapatlelong, ‘me ba ne ba mo kopa hore ba mpe ba ame leha e le qola ea kobo ea hae feela, ‘me bohle ba neng ba mo ama ba ne ba folisoa.
