Nthabeleng Seitlheko Molula-Setulo oa Boto ea Kampani ea Lesotho ea Motlakase (LEC), Rapapa Sepiriti o re lipolotiki ke tsona tse amang kholo le ntlafalo hobane hang ho ba ‘muso oa RFP o be litulong, Letona la Merafo, Mohlomphehi Mohlomi Moleko o ile a ba laela ho emisa hang ka khiro efe kapa efe. Litaba tsena li hlaheletse tulong ea PAC, ka la 13 Pulungoana monongoaha.
Sepiriti o re bona e le boto kamor’a ho hlokomela mathata a neng a tjametse kampani ena haholo bosholu le tsamaiso e se nang neheletsano e hlakileng, moo bahlanka ba neng ba hiriloe ka maemo a ts’oanang a mangolo empa meputso e sa ts’oane, ho boetse ho sa tsebahale hore e bang ho na le phoso e etsahetseng ke mang ea lokelang ho nka boikarabello.
A re ho theoeng ha boto bocha kaha e ile ea qhaloa, tulong ea bona ba ile ba ikeletsa hore ho hlahlojoe libuka tsa kampani ho tloha ka selemo sa 2010 ho fihlela 2022, e le ho etsa liphuputso tsa ts’ebeliso ea lichelete tsa khoebo. O re ba bile ba hloaea kampani ea PWC ho tla thusetsa ka moralo o mocha oa ho ntlafatsa maemo le ho aha system e ntlafetseng molemong oa ponaletso, ‘me kampani e lebeletsoe ho phethela ts’ebetso ka Ts’itoe 2023.
A bonts’a ba bone ho hlokahala hore ba eketse mafapha a macha a tla ba thusa ho batla batseteli kantle ho naha ho tla tsetela phehlong ea motlakase, molemong oa hore naha e itlhahisetse motlakase le ho tseba ho rekisetsa linaha tse ling. A re ka tsela eo ba tla tseba hore ba iketsetse chelete, kaha hona joale ba hula ka litlhako tsa morao le ‘muso o sa fane ka ts’ehetso ea letho.
H’a nts’etsapele taba ea tlhokahalo ea lichelete, o itse ba imetsoe ke litjeo tse boima tsa litheko tsa motlakase, kaha ba o reka ka ntle ho naha le o fehloang kahar’a naha o fokola. O re maemo a holimo a litheko tsa motlakase a ba qosa hore ba imeloe ke phano ea lits’ebeletso empa ba leka ka hohle. A re ba be ba koalle mafapha a ‘muso motlakase, likhoebo le Basotho ba kolotang LEC.
O re har’a mathata a mang a teng kahar’a LEC ke ‘system’ tse neng li sa buisane, ka hona ba ikeletsa ho etsa ‘system’ e bokellang litaba tsohle eo bahlanka ba supileng e sebetsa hantle. O tiiselitse PAC hore esale e ba setho sa boto ho tloha ka 2020, boto le bookameli ba LEC ha bo e-s’o tseke lithentara, ke litaba tse neng li etsahala pejana li se li felile.
Setho sa PAC Montoeli Masoetsa o re LEC e lokela ho hlahloba meoloane eo ba e sebelisang ha ba hokella sechaba motlakase ka ho atolosa lipalo tse holimo, a boela a bont’sa ha bosholu bo bongata ba LEC bo etsa hore khoebo e nyotobele ‘me boto ke eona e tla jarisoa boikarabello e bang khoebo eo e ka putlama.
A supa hore e le bapolotiki ba ke ba ise batho ba nang le litsebo kahar’a boto, molemong oa tsoelopele ea naha le kholo ea khoebo.
Ho sa le joalo, Letona la Lichelete le Nts’etsopele ea Meralo Dr. Rets’elisitsoe Matlanyane, tlalehong ea hae ea lichelete tsa bohareng, o itse ba abetse LEC M57,7Millione ho e thusa ho hlakola mekoloto ea eona moo ba rekang motlakase Naheng ea Mozambique le M144 Millione tokisong ea setsi sa phehlo ea motlakase ‘muela.
