Mathabang Fobo O thoholetsa mokonteraka Relebohile Mosesane Letona la Metsi Mohlomphehi Kemiso Mosenene o etetse Ha Sofonia le Thaba-Bosiu moreneng, moo a neng a hlahloba tšebetso e ntseng e etsoa ke Lekala la Metsi ea ho aha makuka a metsi le ho hokela metsi malapeng a ka holimo ho 700 ho tsoa peiping e kholo ea Metolong, moo a bileng a thoholetsa tšebetso ea konteraka ea Unik, ka la 8 Phupu monongoaha. H’a bua le sechaba sa moo Mosenene o itse ba moo ho etsa tšalo morao hore e fela chelete eo Lekala la Lichelete le faneng ka eona e etsa mosebetsi oa eona.
A re bohle ba tsebe hore lipompo tseo li neng li entsoe li tlil’o koaloa, kaha sechaba se se se hokelletsoe malapeng a sona. A re o thabile haholo ke mokonterata ea phethelang mosebetsi, le hoja mekonteraka e meng e fuoeng mosebetsi hong le eena e ntse e salletse morao, o itse ba tla bona e le Lekala hore ba ekelletsa mokonterata joang hore malapa a joalo le ona a fumane metsi. A re o kopile hore le litsela tse fatuoeng li katoe hantle hore sechaba se se sokole ho hang, ‘me se mo thabisitseng haholo ke ho utloa hore sechaba se ne se chenchana ka mosebetsi le hoja ebile mosebetsi oa nako e nyenyane, empa a re seo sefetotse bophelo ba sona haholo kaha ho sa tšoane leha se ne se sa una molemo ofe kapa ofe.
O phethetse ka hore o tla boela a tla ho tla nehelana ka metsi semolao a se a memmeng le ba WASCO hore ba hlalosetse sechaba hore na litjeo li tsamaea joang tsa metsi. Mokhethoa oa Thaba-Bosiu, Mohlomphehi Thabo Sofonia o lebohile haholo ka mosebetsi o motle o entsoeng kahar’a lipula le hoja ho ntse ho salletse morao liqholotso tsa mokonterata moo a sitiloeng ho etsa tse ling tsa lits’ebetso, empa a re o thabile ke mokhoa oo metsi a tsoang ka teng. A re ho malapa a saletseng morao, ba tla leka ho sheba hore le ona a ba le limpompo joang joaloka a mang.
A thoholetsa mokonterata ka mosebetsi o motle o tsoileng matsoho. A ba tlatselletsa ka hore le moo a tlang ho sebetsa a ‘ne a ipabole ho feta ka moo a ipabotseng metseng eo. O boetse o itse o bone tšebetso e ntle haholo moo sechaba se neng se ntse se abeloa mesebetsi ba chenchana ‘me seo a re se mo thabisitse, kaha a sa fumana litletlebo tsa letho. Ka ho fetisisa o itse o lebohile haholo ka tsela eo ba e etselitsoeng moo sechaba se hlahang Mafeteng se ke keng sa hlotse se fetela Maseru, empa se tla feta tseleng eo.
Ka lehlakoreng le leng, Monghali Moeketsi Mohapi e le Mokanselara o itse ba sotlehile nako e telele haholo, ‘me ke ntlafatso e kholo haholo, kaha e tlil’o tlisa phetoho bophelong ba bona hobane ba tlo atleha hore ba leme meroho ba rekise, ba be le chelete haholo hobane mesebetsi ha e fumanehe ha bobebe. O re ba leboha haholo boikitlaetso ba Mokhethoa oa bona, kaha ebile tšebetso e matla. Leha ho le joalo, o re ba na le liqholotso tse ngata empa kaha tšebetso ha e-s’o fele ba tšepa hore mokonterata o tla phethahatsa litumellano tsa bona kantle ho qeea-qeeo ea letho hore sechaba se khotsofale.
