Moeletsi oa Basotho Beke ea 34 har’a selemo
Labobeli
Ho baloa Bukeng ea Moprofeta Daniele. (2:31-45)
“Molimo o tla hloma ‘muso o ke keng oa timetsoa le ka mohla oo puso ea oona e ke keng ea fetela sechabeng se seng.”
Matsatsing ao, Daniele o ile a re ho Nebukadnezare: Khosi, u bile le pono, u bone setšoantšo se seholo. Setšoantšo sena se ne se le seholohali ‘me se khanya ka mokhoa o makatsang. Se ne se eme kapel’a hau, chebong se tšabeha. Hloho ea sona e n’e le gauda e tšekehileng, sefuba le matsoho a sona e le silvera, mpa le lirope tsa sona e le koporo, meomo e le tšepe, ha maoto ‘ona e le tšepe ka nq’e ‘ngoe le letsopa ka nq’e ‘ngoe.
Eare u sa ntsane u shebile, lejoe la khephoha thabeng le sa thetsoa ke motho, la otla maoto a setšoantšo a entsoeng ka tšepe le letsopa, ‘me la a pshatla. Eaba ho pshatleha tsohle, tšepe, letsopa, koporo, silvera le gauda. Tsa e-ba joaloka ‘moko seotlong nakong ea ho pola, tsa fefoloa ke moea, ha se ke ha sala letho. Athe lejoe le ileng la otla setšoantšo la fetoha thaba e kholo, e ileng ea tlala lefatše lohle.
Toro e bile joalo. Joale re tla hlalosetsa khosi seo toro e se bolelang. Uena, khosi, u khosi ea likhosi; ke uena eo Molimo oa leholimo a mo fileng ‘muso, matla, borena le letlotlo. O behile matsohong a hau bana ba batho, liphoofolo tsa naha le linonyana tsa leholimo, kae kapa kae moo li phelang teng, ‘me o u entse morena oa tsena tsohle. Hloho ea gauda ke uena.
Kamor’a hau, ho tla hlaha ‘muso o mong, o tlasana ho ona oa hau; e nt’o ba ‘muso oa boraro, oa koporo, o tla busa lefatše lohle. ‘Muso oa bone oona o tla ba thata joaloka tšepe, o tšoane le tšepe e pshatlang ‘me e sililang ntho tsohle; joaloka tšepe e thuhang, o tla silila le ho thuha mebuso e meng eohle.
Seo u se boneng hape, e leng maoto le menoana, ka nq’a ‘ngoe e le letsopa la sebopi, ka nq’a ‘ngoe e le tšepe, e tla ba ‘muso o arohaneng; o tla ba le bothata ba tšepe, joalokaha u bone tšepe e sa tsoakane le letsopa.
Empa hobane menoana ea maoto e n’e le tšepe ka nqe ‘ngoe, le letsopa ka nq’e ‘ngoe, ‘muso oo o tla ba thata ka nq’e ‘ngoe, ka nq’e ‘ngoe o fokole.
Seo u se boneng, e leng tšepe e tsoakaneng le letsopa, ke hore batho ba tla theha selekane tlas’a lenyalo, empa ba ke ke ba khoramelana, joaloka ha tšepe e sa tsoakane le letsopa.
Mehleng ea likhosi tseo, Molimo oa leholimo o tla hloma ‘muso o ke keng oa timetsoa le ka mohla, oo puso ea oona e ke keng ea fetela sechabeng se seng. O tla pshatla, o felise mebuso eo kaofela, empa oona o tla ba teng kamehla. Ke se boleloang ke lejoe, leo u le boneng le khephoha thabeng le sa thetsoa ke motho, le pshatla tšepe, koporo, letsopa, silvera le gauda.
Molimo ea matla o tsebisa khosi se tla etsahala mehleng e tlang. Toro ke ea ‘nete, ‘me tlhaloso ea eona e nepahetse.
PESALEMA (3:57-61. R. 59)
MO RORISENG LE MO PHAFE KA BOSAFELENG
Bokang Morena, lona mesebetsi eohle ea Morena,
mo roriseng, le mo phafe ka bosafeleng.
Bokang Morena, lona manyeloi a Morena,
mo roriseng, le mo phafe ka bosafeleng.
MO RORISENG LE MO PHAFE KA BOSAFELENG
Bokang Morena, lona maholimo,
mo roriseng, le mo phafe ka bosafeleng.
Bokang Morena, lona metsi ‘ohle
a ka holim’a maholimo,
mo roriseng, le mo phafe ka bosafeleng.
MO RORISENG LE MO PHAFE KA BOSAFELENG
Bokang Morena, lona makhotla ‘ohle a Morena,
mo roriseng, le mo phafe ka bosafeleng.
MO RORISENG LE MO PHAFE KA BOSAFELENG
Ho baloa Evangeling e halalelang e ngotsoeng ke Luka (21:5-11)
“Lejoe le ke ke la siuoa holim’a lejoe le leng.”
Ka nako eo, batho ba bang ba ne ba bua ka Tempele, ba re e ahiloe ka majoe a matle ‘me e khabisitsoe ka limpho. Jesu a re ho bona: Ho tla tla matsatsi ao ka ‘ona, linthong tseo le li bonang, lejoe le ke keng la siuoa holim’a lejoe le leng, le sa liheloe fatše. Eaba ba ba ‘motsa, ba re: Moruti, tseo li tla etsahala neng, ‘me pontšo e tla ba efe ha li tla qala ho etsahala?
Jesu a ba araba, a re: Hlokomelang, le tle le se ke la thetsoa hobane ba bangata ba tla tla ka lebitso la ka, ba re: Ke ‘na Kriste ‘me nako e se e le haufi. Empa le se ke la ba sala morao. Le hona mohla le utloang lintoa le mefere-fere, le se ke la tšaba; e ka khona tsena li etsahale pele, empa e tla be e e-s’o be bofelo.
A eketsa, a re: Sechaba se tla tsohela sechaba matla, le ‘muso ‘muso o mong; ‘me ho tla ba teng litšisinyeho tse kholo tsa lefatše libakeng tse ling, le mafu a seoa le litlala libakeng tse ling: ho be le lintho tse tšosang le lipontšo tse kholo leholimong.
