Moeletsi oa Basotho Beke ea 25 har’a selemo
Labone
Ho baloa Bukeng ea Moprofeta Haggai. (1:1-8)
“Le tl’o aha Ntlo e tla nkhahla.”
Ka selemo sa bobeli sa puso ea khosi Dariuse, tsatsing la pele khoeling ea botšelela, Morena a lebisa Lentsoe la hae, ka moprofeta Haggai, ho ‘musi oa Juda, Zorobabele mor’a Shealthiele, le ho moprista e moholo Joshua mor’a Jehosadake, la re: Ke sena seo Morena oa makhotla a se bolelang: Sechaba sena se re: Nako ha e-s’o fihle ea ho aha bocha Tempele ea Morena.
Joale lentsoe la Morena la tla ka moprofeta Haggai, la re: Na ke nako ea hore lona le phele matlung a khabisitsoeng ka mapolanka, ha Ntlo ee eona e ntse e le lesupi? Ka hona ke sena seo Morena oa makhotla a se bolelang: Inahaneng ka metsamao ea lona. Le jetse haholo, empa kotulo e’a fokola; le jele, empa ha lea khora; le noele, empa ha lea khotsofala; le apere, empa ha lea futhumala; ea sebeletsang moputso o o bolokile mokotleng o lesoba.
Ke sena seo Morena oa makhotla a se bolelang: Inahaneng ka metsamao ea lona. Hloellang thabeng, remang lifate, le tl’o aha Ntlo e tla nkhahla ‘me e ntlotlise, ho rialo Morena.
PESALEMA 149
MORENA O KHAHLIILOE KE SECHABA SA HAE.
Binelang Morena sefela se secha,
le mo roke phuthehong ea metsoalle ea hae.
Israele a ke a ithabele ka ‘Mopi oa hae,
bana ba Sione ba nyakalle ka khosi ea bona.
MORENA O KHAHLIILOE KE SECHABA SA HAE.
Ba ke ba rorise lebitso la hae ka mehobelo,
ba mo roke ka meropana le harepa;
hobane Morena o khahliloe ke sechaba sa hae,
o sitsa ba hlophehileng ka pholoho.
MORENA O KHAHLIILOE KE SECHABA SA HAE.
Metsoalle ea hae e tla ba motlotlo,
e hooe ka thabo ha e itihela ka pele ho eena;
e phafe Molimo ka lentsoe le phefa:
ke bona boitumelo ba metsoalle eohle ea hae.
MORENA O KHAHLIILOE KE SECHABA SA HAE.
Ho baloa Evangeling e halalelang e ngotsoeng ke Luka. (9:7-9)
“Joannes, ke mo khaotse hloho; empa eo ke utloang tse joalo ka eena ke mang na?”
Ka nako eo Morena Heroda a utloa tsohle tse etsoang ke Jesu ‘me o n’a tsielehile, hobane batho ba bang ba ne ba re: Joannes o tsohile bafung; athe ba bang ba re: Elia o hlahile; hape ba bang ba re: E mong oa baprofeta ba khale o tsohile. Joale Heroda a re: Joannes, ke mo khaotse hloho; empa eo ke utloang tse joalo ka eena ke mang na? ‘Me o n’a lakatsa ho bona Jesu.
