Moeletsi oa Basotho MOKETE OA TSOALO EA MARIA MOVIRIGO EA LEHLOHONOLO.
‘Mantaha
Ho baloa Bukeng ea Moprofeta Mikea. (5:1-4)
“Ho tla tsoa ho uena, ea tla rena holim’a Israele.”
Ke sena seo Morena a se bolelang: Ha e le uena, Bethlehema Efrata, leha u le e monyenyane har’a meloko ea Juda, ho uena ho tla hlaha oa ka ea tla busa Israele; o tsoa motsong oa khale-khale, oa mehla e fetileng. Ka baka leo, Molimo o tla ba furalla, ho fihlela nako eo ea lokelang ho beleha a tla beleha ka eona, ‘me bana babo ba setseng ba tla khutlela baneng ba Israele.
Eena o tla ema, a alose mohlape oa hae ka matla a Morena, lebitsong le tlotlehang la Morena Molimo oa hae. Ba tla tsitsa, hobane joale boholo ba hae bo tla finyella pheletsong tsa lefatše. Eena ka sebele e tla ba khotso.
Pesalema 12
KE TLA TLALOA KE NYAKALLO KA BAKA LA MORENA.
Ha e le ‘na, ke tšepile mohau ua hau,
pelo ea ka e nyakaletse, hobane u mpholositse.
Ke tla binela Morena
ea nketselitseng tse molemo.
KE TLA TLALOA KE NYAKALLO KA BAKA LA MORENA.
Ho baloa Evangeling e halalelang e ngotsoeng ke Matheus. (1:1-16.18-23)
“Se emotsoeng ka ho eena se tsoa ho Moea o Halalelang.”
[Buka ea leloko la Jesu Kriste, mora oa Davida,
mora oa Abrahama:
Abrahama o ne a tsoale Isaaka.
Isaaka a tsoala Jakobo.
Jakobo a tsoala Juda le bana babo.
Juda a tsoala Faarese le Zarame ka Thamare.
Farese a tsoala Esrome.
Esrome a tsoala Arame.
Arame a tsoala Aminadaba.
Aminadaba a tsoala Naasone.
Naasone a tsoala Salmone.
Salmone a tsoala Booze ka Rahaba.
Booze a tsoala Obede ka Ruthe.
Obede a tsoala Jesse.
Jesse a tsoala khosi Davida.
Davida eena a tsoala Salomone ka mohats’a Uria.
Salomone a tsoala Roboama.
Roboama a tsoala Abia.
Abia a tsoala Asa.
Asa a tsoala Josafate.
Josafate a tsoala Jorama.
Jorama a tsoala Oziase.
Oziase a tsoala Jothama.
Jothama a tsoala Akaze.
Akaze a tsoala Ezekiase.
Ezekiase a tsoala Manasse.
Manasse a tsoala Amone.
Amone a tsoala Josiase.
Josiase a tsoala Jekoniase le bana babo
ka nako ea ho fallisetsoa Babilone.
Kamor’a ho fallisetsoa Babilone,
Jekoniase a tsoala Salathiele.
Salathiele a tsoala Zorobabele.
Zorobabele a tsoala Abiude.
Abiude a tsoala Eliakime.
Eliakime a tsoala Azore.
Azore a tsoala Sadoke.
Sadoke a tsoala Akhime.
Akhime a tsoala Eliude.
Eliude a tsoala Eleazare.
Eleazare a tsoala Mathane.
Mathane a tsoala Jakobo.
Jakobo a tsoala Josefa, mohats’a Maria,
mosali eo Jesu, ea bitsoang Kriste,
ea neng a tsoaloe ke eena.]
Tsoalo ea Jesu ea e-ba joana: ‘M’ae Maria, ha a se a lebelelitsoe ke Josefa, ba e-s’o ka ba phela ‘moho, a fumaneha e le moimana ka matla a Moea o Halalelang. Ere ka ha Josefa, mohats’a hae, a ne a lokile ‘me a sa rate ho mo hobosa, a rera ho mo hlala ka lekunutu.
Eare a sa hopotse joalo, lenyeloi la Morena la be le itlhahisa ho eena torong, le re: “Josefa, mor’a Davida, u se ke ua tšaba ho inkela Maria, mohats’a hau; hobane se emotsoeng ka ho eena se tsoa ho Moea o Halalelang. O tla beleha mora eo u tla mo reha lebitso la Jesu, hobane ke eena ea tla pholosa sechaba sa hae libeng tsa sona.”
Joale hona hohle ho etsahetse hore ho tle ho phethahale se neng se boleloa ke Morena ka moprofeta, ha a re:
Movirigo o tla emola, a belehe mora, ea tla bitsoa Emmanuele, e leng ho re “Molimo o na le rona,” ha ho fetoloa.
