Moeletsi oa Basotho Sehopotso sa Theresia oa ngoan’a Jesu, Movirigo le Moruti oa Kereke.
Laboraro
Ho baloa Bukeng ea Pele ea Likhosi. (19:4-9.11-15)
“U ee ho ema pel’a Morena holim’a thaba.”
Matsatsing ao, Elia a tsamaea har’a lefeella, leeto la letsatsi. A fihla sefateng sa junipera, a lula tlas’a sona. A itakaletsa lefu ka mantsoe ana: Ho sa lekane, Morena; nka bophelo ba ka, hobane ha kea loka ho feta bo ntat’a rona. A nt’o tjapalla fatše, a khaleha moriting oa sefate.
Ke moo lenyeloi la Morena le ileng la fihla, la mo sisinya, la re ho eena: “Tsoha, u je!” A qamaka ‘me a bona pel’a hloho ea hae bohojoana bo besitsoeng holim’a mashala a hlenneng, le sehoana sa metsi. A ja, a ba a noa, a boela a khaleha.
Lenyeloi la Morena la boela la tla, la mo sisinya, la re: “Tsoha, u je, hobane u sa saletsoe ke tsela e telele.” Hoba a tsohe, a ja, a noa, ‘me ka matla a sejo sena a tsamaea matsatsi a mashome a mane le masiu a mashome a mane, ho ea fihla Horebe, thabeng ea Molimo. Elia a kena lehaheng le leng, a qeta bosiu teng. Eaba lentsoe la Morena le mo fihlela, le re:
Tsoa, u ee ho ema pel’a Morena holim’a thaba. Eaba Morena o tlil’o feta. Moea o matla haholo oa tsukutla lithaba, oa patsola mafika ka pele ho Morena: empa Morena o n’a se moeeng oo. Kamor’a moea, ha e-ba le tšisinyeho ea lefatše; empa Morena o n’a se tšisinyehong eo.
Kamor’a tšisinyeho ea lefatše, ha e-ba mollo; empa Morena o n’a se mollong oo. Kamor’a mollo, ha e-ba le molumo oa moea o mosesane. Ha Elia a utloa moluma oo, a ikoahela sefahleho ka seaparo sa hae, a tsoela kantle a ema monyako oa lehaha, eaba lentsoe le mo fihlela le re: U moo ka baka la’ng, Elia?
A re: Ke hobane ke cheseheletse Morena, Molimo oa makhotla, haholo. Bana ba Israele bona ba furaletse selekane sa hau, ba helelitse lialetare tsa hau, ba bile ba bolaile baprofeta ba hau ka sabole. Ke se ke setse ke le mong feela, ebile le ‘na ba batla ho nkamoha bophelo.
Morena a ba a re ho eena: Khutla ka tsela eo u tlileng ka eona, e haholang lefeella, u lebe Damaseka.
PESALEMA 148 (1-2.11-14) ALLELUIA.
Rorisang Morena, lona tsohle tse maholimong,
mo roriseng liphahameng.
Mo roriseng, lona manyeloi ‘ohle a hae,
mo roriseng, lona makhotla ‘ohle a hae.
ALLELUIA.
Lona marena a lefatše, le lona lichaba tsohle,
lona mahosana le baahloli bohle ba lefatše,
lona bahlankana le lona baroetsana,
lona maqheku le lona ba bacha.
ALLELUIA.
Ba ke ba rorise lebitso la Morena,
hobane lebitso la hae le inotši
botlotlehi ba hae bo phahametse leholimo le lefatše,
‘me o matlafatsa sechaba sa hae.
ALLELUIA.
Ho baloa Evangeling e halalelang e ngotsoeng ke Luka. (12:32-34)
“Ntat’a lona o khahliloe ke ho le neha ‘muso.”
Ka nako eo, Jesu a re ho barutuoa ba hae: Se tšabeng, lona mohlatsoana, hobane Ntat’a lona o khahliloe ke ho le neha ‘muso. Rekisang tseo le li ruileng ‘me le fane. Iketsetseng mekotlana e sa tsofaleng ea chelete, le monono o se nang ho qepha maholimong, moo lesholu le sa atameleng le moo tšoele e sa jeng. Hobane moo monono oa lona o leng teng, ke hona moo le eona pelo ea lona e tlang ho ba teng.
