Moeletsi oa Basotho Labone
Beke ea 22 har’a selemo
Ho baloa Lengolong la Moapostola Paulosi ho Ba-Kolosse. (1:9-14)
“O re ntšitse matleng a lefifi, ‘me o re fetiselitse ‘musong oa Mora oa hae ea ratoang.”
Bana beso! Ha re phetse ho le rapella le ho le kopela ho Molimo hore le tlale tsebo ea thato ea hae, bohlaleng le kutloisisong eohle ea Moea.
Ka tsela ena, le tla tseba ho tsamaea ka mokhoa o tšoanelang Molimo ‘me o mo khahlisang linthong tsohle; le tla beha litholoana ka mesebetsi eohle e molemo, ‘me le tla hola tsebong ea Molimo; le tla matlafatsoa ka ho tlala ka matla a letlotlo la hae, le tle le be le tiisetso le mamello e phethehileng; ‘me ka thabo re leboha Molimo Ntate, ea re entseng ba lokelang ho ba le kabelo lefeng la bahalaleli leseling.
Efela o re ntšitse matleng a lefifi, ‘me o re fetiselitse ‘musong oa Mora oa hae ea ratoang, eo re nang le topollo le tšoarelo ea libe ka mali a hae.
PESALEMA 97
MORENA O BONTŠITSE PHOLOHO EA HAE.
Morena o bontšitse pholoho ea hae,
o bonahalitse toka ea hae mahlong a lichaba.
O ikhopolitse mohau le botšepehi ba hae
bakeng la ntlo ea Israele.
MORENA O BONTŠITSE PHOLOHO EA HAE.
Liqola tsohle tsa lefatše
li bone pholoho ea Morena oa rona.
Lona mafatše ‘ohle, etsetsang Morena litlatse,
hlasimolohang ke thabo, le mo roke ka lifela.
MORENA O BONTŠITSE PHOLOHO EA HAE.
Binelang Morena ka harepa,
ka harepa le ka ‘mino.
Ka meletso ea literompeta le ea liphala,
etsetsang Morena Molimo litlatse.
MORENA O BONTŠITSE PHOLOHO EA HAE.
Ho baloa Evangeling e halalelang e ngotsoeng ke Luka. (5:1-11)
“Ba tlohela tsohle ‘me ba mo latela.”
Ka nako eo, ha etsahala hore, ha matšoele a n’a mo khobokanela ho utloa lentsoe la Molimo, Jesu a eme lebopong la letša la Gennesaretha. A bona likepana tse peli li eme lebopong la letša; batšoasi ba ne ba tsoile ho tsona, ba hlatsoa matlooa a bona. Eaba o kena sekepaneng se seng, e leng sa Simone, a mo kopa hore a se suthise hanyenyane lebopong; a nt’o lula ‘me a ruta matšoele, a le ka sekepaneng.
Eitse ha a qeta ho bua, a re ho Simone: Sesisetsa moo ho tebang, le akhele matlooa a lona, le tšoase. Simone a araba, a re ho eena: Morena, re sebelitse ka thata bosiu bohle, re sa tšoase letho; empa ho ea ka polelo ea hau ke tla akhela letlooa. ‘Me ha ba entse joalo, ba tšoasa lihlapi ka bongata bo boholo, hoo letlooa la bona le neng le taboha. Ba hoehla balekane ba bona ba ka sekepaneng se seng hore ba tle ho ba thusa. Ba tla ‘me ba tlatsa likepana tse peli, hoo li batlileng li teba.
Eitse ha Simone Peterosi a bona hoo, a itihela mangoleng a Jesu, a re: Tloha ho ‘na Morena, hobane ke motho oa moetsalibe! Etsoe o n’a maketse haholo, hammoho le bohle ba nang le eena, ka tšoaso ea lihlapi tseo ba neng ba li tšoasitse. Ha e-ba joalo le ho Jakobo le Joannes, bara ba Zebedea, bao e neng e le balekane ba Simone. Eaba Jesu o re ho Simone: U se ke ua tšoha; ho tloha joale u tla ba ea tšoasang batho. ‘Me ha ba se ba tlisitse likepana tsa bona lebopong, ba tlohela tsohle ‘me ba mo latela.
