Moeletsi oa Basotho Laboraro
Beke ea 15 har’a selemo
Ho baloa Bukeng ea Exoda. (3:1-6.9-12)
“Molimo a bitsa Moshe a le har’a sehlahla se tukang.”
Matsatsing ao, Moshe o n’a alosa likhutšoane tsa Jethro mohoe oa hae, moprista oa Midiane. A isa mohlape ka nq’ane ho lefeella, `me a fihla thabeng ea Molimo, Horebe. Eaba lenyeloi la Morena le iponahatsa ho eena, lelakabeng la mollo, le har’a sehlahla. Ha Moshe a talima, a bona sehlahla se tuka ke mollo, empa se sa lorele. Moshe a re: A nke ke pote le mane, ke bone pono ena e makatsang, le hore na ke ka baka la’ng ha sehlahla se sa che.
Ha Morena a bona hore o pota le moo ho tla sheba, Molimo a ‘mitsa a le har’a sehlahla, a re: Moshe, Moshe! Eena a re: Ke ‘na enoa. A re: U se ke ua atamela mona. Rola meqathatso ea hau, hobane qalo eo u emeng ho eona ke mobu o halalelang. A eketsa, a re: Ke ‘na Molimo oa ntat’ao, Molimo oa Abrahama, Molimo oa Isaaka, Molimo oa Jakobo. Eaba Moshe o ipata sefahleho, hobane a tšaba ho talima Molimo.
Joale, ke mona mohoo oa bana ba Israele o fihlile ho ‘na, ebile ke bone le kamoo Ba-Egepeta ba ba tubang kateng. Joale tloho ke u rome ho Faro, e le hore u ntše sechaba sa ka, bana ba Israele, Egepeta. Moshe a re ho Molimo: Ke le mang, nka eang ho Faro, ho ntša bana ba Israele Egepeta?
A re: Ke tla ba le uena, ‘me ho uena pontšo ea hore ke ‘na ea u romang, e tla ba ena: Mohla o ntšang sechaba Egepeta, le tla sebeletsa Molimo holim’a thaba eona ena.
PESALEMA 102
MORENA O MOSA, O LEREKO.
Boka Morena, moea oa ka, ka matla ‘ohle a hau,
u boke lebitso le halalelang la hae.
Boka Morena, moea oa ka,
u se ke ua lebala melemo eohle ea hae.
MORENA O MOSA, O LEREKO.
Ke eena ea tšoarelang melato eohle ea hau,
ea folisang maloetse ‘ohle a hau;
o pholosa bophelo ba hau lebitleng,
o u roesa mohau le mosa se-ka-tlokola.
MORENA O MOSA, O LEREKO.
Morena o sebetsa ka ho loka,
o ahlolela bohle ba tlatlapuoang.
O senoletse Moshe litsela tsa hae,
le bana ba Israele liketso tsa hae.
MORENA O MOSA, O LEREKO
Ho baloa Evangeling e halalelang e ngotsoeng ke Matheus. (11:25-27)
“U li patetse ba bohlale le ba seli ‘me u li senoletse bana.”
Ka nako eo Jesu a bua joana: Kea u leboha, Ntate, Morena oa leholimo le oa lefatše, hobane litaba tsena u li patetse ba bohlale le ba seli ‘me u li senoletse bana. E, Ntate, hobane hona e bile boithatelo ba hau.
Tsohle ke li nehiloe ke Ntate. Ha ho ea tsebang Mora, ha e se Ntate; ‘me ha ho ea tsebang Ntate, ha e se Mora le eo Mora a ratang ho mo senolela eena.
