Moeletsi oa Basotho Beke ea 5 ea Karisima
Laboraro
Ho baloa Bukeng ea Moprofeta Daniele. (3:14-20.91-92.95)
“Molimo o rometse lenyeloi la hae ho pholosa bahlanka ba hae.”
Matsatsing ao, Nebukadnezare o ile a re: “Ebe ke ‘nete hore lona Shadrake, Meshake le Abede-Nego, ha le sebeletse melimo ea ka, leha e le ho khumamela setšoantšo sa gauda seo ke se emisitseng?
Joale, na le itokiselitse hore hang ha le utloa molumo oa terompeta, phala, cithara, harepa, cimbala, meropa le liletsa tsa mefuta-futa, le itihele fatše, le khumamele setšoantšo seo ke se entseng? Ho seng joalo, ha le sa se khumamele, le tla akheloa hang-hang ka seboping sa mollo o bohale; ‘me ke molimo ofe o ka le namolelang liatleng tsa ka?”
Shadrake, Meshake le Abede-Nego ba fetola khosi Nebukadnezare, ba re: “Ha re hloke ho u arabela letho tabeng ena. Ha eba ho na le Molimo ea ka re pholosang seboping sa mollo o bohale, ke Molimo oa rona eo re mo sebeletsang, ‘me o tla fela a re pholose liatleng tsa hau, khosi. Ha eba a sa etse joalo, u k’u tsebe hantle, khosi, hore re ke ke ra sebeletsa melimo ea hau; le setšoantšo sa gauda seo u se emisitseng, re ke ke ra se khumamela.”
Ke moo Nebukadnezare a ileng a tlala khalefo, sefahleho sa hae sa hloenya ka baka la Shadrake, Meshake le Abede-Nego. A laela hore ba akheloe ka seboping ho besoe mollo o matla ha supa ho feta o eeng o besoe. Eaba o laela banna ba bang ba matla haholo ba mabotho a hae ho tlama Shadrake, Meshake le Abede-Nego, le ho ba akhela ka seboping sa mollo o bohale.
Khosi Nebukadnezare a raoha, a tšohile. A botsa baeletsi ba hae, a re: “Na ha rea ka ra akhela batho ba bararo har’a mollo ba tlanngoe?” Bona ba mo araba, ba re: “Ke ‘nete, ho joalo, khosi.” A fetola, a re: “Empa ke bona batho, ba se ba le bane, ba itsamaela har’a mollo ba sa tlangoa, ba sa hlaheloe ke kotsi, ‘me oa bone o bonahala eka ke Mor’a Molimo.”
Nebukadnezare a ba a hooa a re: “Ho bokoe Molimo oa Shadrake, Meshake le Abede-Nego, ea rometseng lenyeloi la hae ho pholosa bahlanka ba hae ba mo tšepileng, ba tlotse taelo ea khosi, ba tela ‘mele ea bona ho e-na le ho sebeletsa le ho khumamela molimo o mong ha e se Molimo oa bona.”
PESALEMA
MO RORISENG, LE MO PHAFE KA BOSAFELENG.
U bokoe, Morena, Molimo oa bo-ntat’a rona,
u rorisoe ‘me u phafshoe ka bosafeleng.
Ho bokoe lebitso la hau
le tlotlisehang ‘me le halalelang,
le rorisoe haholo
‘me le phafshoe ka bosafeleng.
U bokoe tempeleng ea letlotlo le halalelang la hau,
u rorisoe haholo ‘me u phafshoe ka bosafeleng.
U bokoe u le teroneng ea ‘muso oa hau.
u rorisoe ‘me u phafshoe ka bosafeleng.
U bokoe, uena ea talimang maliba,
ea lutseng holim’a likerubime,
u rorisoe ‘me u tlotlisoe ka bosafeleng.
U bokoe, Morena, leholimong le tiileng la hau,
u rorisoe ‘me u tlotlisoe ka bosafeleng.
Ho baloa Evangeling e halalelang e ngotsoeng ke Joannes. (8:31-42)
“Ha Mora a le lokolla, e tla ba le lokolohile ka sebele.”
Ka nako eo, Jesu a bolella Bajodi ba neng ba lumetse ho eena, a re: Ekare ha le tiisetsa lipolelong tsa ka, le tla ba barutuoa ba ka ruri. Le tla tseba ‘nete ‘me ‘nete e tla le lokolla. Bajodi ba mo araba, ba re: Rona re ba leloko la Abrahama, ‘me ha re e-s’o be makhoba a mang kapa mang. U ka bolela joang, ua re: le tla lokoloha na?
Jesu a ba fetola, a re: Ka ‘nete-nete, kea le bolella, mang le mang ea etsang sebe ke lekhoba la sebe. Lekhoba ha le lule ka tlung kamehla, athe mora eena o lula teng kamehla. Joale, etlare ha Mora a le lokolla, e tla ba le lokolohile ka sebele. Ke tseba hore le ba leloko la Abrahama. Leha ho le joalo, le batla ho mpolaea, hobane polelo ea ka ha e amohelehe ho lona. ‘Na ke bolela seo ke se boneng ho Ntate; le lona le etsa seo le se boleletsoeng ke ntat’a lona.
Ba araba, ba re ho eena: Ntat’a rona ke Abrahama. Jesu a re ho bona: Ha eba le bana ba Abrahama, etsang mesebetsi ea Abrahama. Empa joale le batla ho mpolaea, ‘na motho ea le boleletseng ‘nete eo ke e utloileng ho Molimo. Abrahama ha a ka a etsa ntho e joalo. Lona le etsa mesebetsi ea ntat’a lona.
Ba re ho eena: Ha rea tsoalloa bohloleng; re na le Ntat’a rona a le mong, e leng Molimo. Joale Jesu a re ho bona: Hoja Molimo e le Ntat’a lona, le ka be le nthatile, hobane ke tsoile ho Molimo ‘me ke tlile. Ha kea itlisa, empa ke eena ea nthomileng.
