Vinkmag ad

La 28 Tlhakubele 2025

Beke ea 3 ea Karisima

Labohlano

Ho baloa Bukeng ea Moprofeta Hosea. (14:2-10)

“Ha re sa tla re “Molimo oa rona” ho seo e leng mosebetsi oa matsoho a rona.”

Ke sena seo Morena a se bolelang: Israele, khutlela ho Morena, Molimo oa hau, hobane u oele ka baka la molato oa hau. Itokisetseng ho hlahisa sello sa lona, le khutlele ho Morena, le re ho eena: Ak’u tšoarele molato oohle oa rona, u re tsoele molemo; bakeng sa ho nyehela mahlabelo a lipohoana, re tla u leboha ka melomo ea rona. Ba-Assiria ba ke ke ba re pholosa, ha re sa tla palama lipere tsa ntoa. Ha re sa tla re: Molimo oa rona! Ho seo e leng mosebetsi oa matsoho a rona. Hobane ke uena ea utloelang khutsana bohloko.

Joale ke tla ba folisa bokoenehi ba bona, ke ba rate ka pelo eohle ea ka; hobane khalefo ea ka e ba hatohile. Ke tla ba joaloka phoka ho Israele; o tla thunya joaloka mohalalitoe, a kenye metso mobung joaloka kedare ea Lebanone. O tla hlahisa mahlomela, o tla ba le botle bo kang ba mohloare, a be monko o monate joaloka Lebanone.

Ba-Israele ba tla boela ba lula moriting oa ka, ba tla lema koro haholo; ba tla thunya joaloka morara, ba tume joaloka veine ea Lebanone. Efraime o na le taba efe le melimo ea bohata? ‘Na kea mo mamela, ‘me kea mo hlokomela. ‘Na ke joaloka sefate sa ciprese se setala kamehla: ke ka thuso ea ka u behang litholoana. Ea bohlale a ke a utloisise taba tsena, ea nang le kelello a li tsebe. Litsela tsa Morena li otlolohile; ba lokileng ba tsamaea ka tsona, empa baetsalibe ba tla khoptjoa ho tsona.

PESALEMA 80

KE ‘NA MORENA MOLIMO OA HAU, U MAMELE LENTSOE LA KA.

Ha utloahala puo e sa tsejoeng, e re:

Ke tlositse mojaro lehetleng la hae,

matsoho a hae a nyahlatsa seroto sa liahi.

Ha u le matšoenyehong u ile ua hoeletsa,

ka u pholosa.

Ka u araba, ke siretse ka maru a lumang,

ka u nonya metsing a meriba.

Mamela, uena sechaba sa ka, ke u lemose;

Israele, hoja u ka nkutloa!

Ha hao ho se be Molimo o sele,

u se ke ua khumamela molimo o sa tsebisahaleng.

Ke ‘na Morena Molimo oa hau,

ea u ntšitseng naheng ea Egepeta;

ahlama haholo, ke tle ke tlatse molomo oa hau.

Hoja sechaba sa ka se ne se ka ‘mamela,

hoja Israele a ne a ka tsamaea tseleng tsa ka!

 Empa Israele ke ne ke tla mo fepa ka koro e ntlehali

ke mo khorise ka linotši tse tsoang lefikeng.

Ho baloa Evangeling e halalelang e ngotsoeng ke Mareka. (12:28-34)

“Morena Molimo oa hau ke eena Morena a inotši; u mo rate.”

Ka nako eo, e mong oa bangoli a fihla ho Jesu, a ‘motsa, a re: Melaong eohle ke ofe oa pele? Jesu a mo fetola, a re: Molao oa pele ke ona: Mamela, uena Israele, Morena Molimo oa rona ke eena Morena a inotsi: U tla rata Morena Molimo oa hau ka pelo ea hau eohle le ka moea oa hau oohle le ka kutloisiso ea hau eohle, le ka matla a hau ‘ohle. Oa bobeli ke ona: U tla rata oa heno joaloka ha u ithata. Ha ho molao o mong o fetang ena ka boholo.

Eaba mongoli o re ho eena: Ke hantle, moruti, u boletse ‘nete ha u re Molimo o mong feela, ‘me ha ho e mong kantle ho eena, le hore o tšoanetse ho ratoa ka pelo eohle, le ka kutloisiso eohle, le ka moea oohle, le ka matla ‘ohle, le hore ho rata oa habo motho joaloka ha motho a ithata, ke taba e kholo ho feta licheso le mahlabelo ‘ohle.

Eitse ha Jesu a bona hore o arabile ka bohlale, a re ho eena: Ha u sa le hole le ‘muso oa Molimo. Ha ho motho le ea mong ea kileng a hlola a e-ba le sebete sa ho ‘motsa hape.

Vinkmag ad

Read Previous

La 27 Tlhakubele 2025

Read Next

Moruo o theohile

Leave a Reply

Your email address will not be published. Required fields are marked *

Most Popular