Vinkmag ad

La 25 Tlhakubele 2025

Labobeli

MOKETE OA PEELO EA MARIA MOVIRIGO

Ho baloa Bukeng ea Moprofeta Isaia. (7:10-14)

“Moroetsana o tla emola.”

Matsatsing ao, Morena a boela a bua le Akhaze, a re ho eena: “Ikopele pontšo ho Morena Molimo oa hau, e ka ba e hlahang tlase-tlase, Qalong-ea-bafu, kapa e tsoang holimo-limo.” Empa Akhaze a fetola, a re: “Ha ke na ho kopa, nke ke ka leka Morena.”

Ke ha Isaia a re: “Mamelang joale, lona ba ntlo ea Davida. Hleka ha lea khotsofala ke ho khathatsa batho, ha e le moo le khathatsa le Molimo oa ka? Ka baka leo, Morena ka bo-eena o tla le fa pontšo: moroetsana o tla emola, a belehe mora, ‘me a mo rehe lebitso la Emmanuele,” ke hore “Molimno o na le rona.”

Pesalema 39

 KE ‘NA EO, KE TLA HO PHETHA THATO EA HAU, MORENA.

Ha u khahloe ke mahlabelo, leha e le linyehelo,

empa u nthibolotse litsebe; ha u hloke licheso

le mahlabelo bakeng la sebe;

ke ha ke re: Ke ‘na eo, kea tla!

Bukeng ho ngotsoe taelo

ea hore ke phethe thato ea hau.

Molimo oa ka, lerato la molao oa hau

le botebong ba pelo ea ka.

Ke phatlalalitse tse monate phuthehong e kholo,

ha kea ka ka thola, ua tseba, Morena.

Toka ea hau ha kea ka ka ipolokela eona

boinotšing ba pelo ea ka,

empa ke boletse botšepehi ba hau le pholoho ea hau.

Ha kea ka ka patela phutheho e kholo

mohau le ‘nete ea hau.

Ho baloa Lengolong ho Ba-Heberu. (10:4-10)

“Ke ‘na enoa! Molimo, ke tlil’o phetha thato ea hau.”

Bana beso! Ha ho kamoo mali a lipoho le a liphooko a ka tlosang libe kateng.

Ka baka leo, ha Kriste a kena lefatšeng, a re: Ha u batle mahlabelo leha e le linyehelo, empa u nketselitse ‘mele; ha u khahloe ke licheso leha e le mahlabelo ka baka la libe. Ke ha ke re: Ke ‘na enoa! Molimo, ke tlil’o phetha thato ea hau, ho ea ka se ngotsoeng ka ‘na bukeng ea Molao.

O qalile ka ho re: Ha u batle mahlabelo, linyehelo, licheso leha e le mahlabelo ka baka la libe, ha u khahloe ke tsona. Empa e ntse e le tsona tsane tse laetsoeng ke Molao. Joale o ekelitse ka ho re: Ke ‘na enoa, ke tlil’o phetha thato ea hau.

Ka hona Molimo o felisa mahlabelo a khale, ‘me o beha ntho e ncha bakeng sa ‘ona. Ke ka thato eo re halalelitsoeng ka nyehelo ea ‘mele oa Jesu Kriste, e entsoeng hanngoe feela.

Ho baloa Evangeling e halalelang e ngotsoeng ke Luka. (1:26-38)

“U tla emola popelong, u belehe mora.”

Ka nako eo, lenyeloi Gabriele la romeloa ke Molimo motseng oa Galilea o bitsoang Nazaretha, ho Movirigo ea neng a qetsoe ke monna ea bitsoang Josefa, oa ntlo ea Davida. Lebitso la Movirigo e ne e le Maria.

Lenyeloi la fihla ho eena, la re: “Ahe ea tlotliloeng haholo, Morena o na le uena; u lehlohonolo har’a basali.” A ferekanngoa ke lentsoe lena, ‘me a ipotsa hore na tumeliso ena e bolela’ng.

Eaba lenyeloi le re ho eena: Se tšohe, Maria, hobane u fumane mohau ho Molimo. Bona, u tla emola popelong, u belehe mora, ‘me u tla mo reha lebitso la Jesu o tla ba moholo, a bitsoe Mora oa Ea holimo-limo. Morena Molimo o tla mo neha terone ea Davida ntat’ae; o tla rena holim’a ntlo ea Jakobo ka bosafeleng, ‘me borena ba hae ha bo ka ke ba e-ba le bofelo.

Maria a re ho lenyeloi: Hoo ho tla etsahala joang, ha e le moo ke sa tsebe monna? Lenyeloi la araba, la re ho eena; Moea o Halalelang o tla theohela ho uena. ‘me matla a Ea holimo-limo a tla u haeletsa. Ka baka leo Ea halalelang ea tla belehuoa ke uena o tla bitsoa Mora oa Molimo. Le eena Elisabetha, mohaeno, o emotse mora botsofaling ba hae, ‘me ena ke khoeli ea botšelela ho eo ea neng a bitsoa nyopa; hobane ha ho letho le ka sitang Molimo.

Ke ha Maria a re: Ke ‘na enoa lekhabunyane la Morena; ha ho ke ho etsoe ho ‘na ka ho ea ka polelo ea hau. ‘Me lenyeloi la mo siea.

Vinkmag ad

Read Previous

La 24 Tlhakubele 2025

Read Next

La 26 Tlhakubele 2024

Leave a Reply

Your email address will not be published. Required fields are marked *

Most Popular