Moeletsi oa Basotho Labotšelela la Molora
Ho baloa Bukeng ea Moprofeta Isaia. (58:9-14)
“Ka ho se iketsetse mesebetsi ea hau, u tla ithabela ka Morena.”
Ke sena seo Morena a se bolelang: Ha u ka felisa khatello haeno, ua khaotsa ho supa ka monoana le ho bua hampe, ha u ka phomosetsa ea lapileng, ua khotsofatsa litakatso tsa ea tujoang, ke moo leseli la hau le tla khanya lefifing, mafifi ao u leng har’a ‘ona a be joaloka motšeare.
Morena o tla u tataisa kamehla, a u khorise esita le libakeng tse cheleng ke letsatsi. O tla matlafatsa litho tsa hau, u ke serapa se noesetsoang le seliba seo metsi a sona a sa psheng. U tla tsosetsoa masupi a khale-khale, u ahe bocha holim’a metheho ea boholo-holo. U tla bitsoa “Moahi oa likheo,” le “Motsosi oa lithako.”
Ha u ka tlohela ho tlontlolla sabbatha ka ho mathela mesebetsi ea hau tsatsing le halalelang la ka, ha u ka bitsa sabbatha letsatsi le khahlehang, letsatsi le halalelang la Morena; ua le bitsa le hlomphehang, ha u ka le hlonepha ka ho se latele merero ea hau, ka ho se iketsetse mesebetsi ea hau le ka ho se etse meqoqo ea bosaoana, ke moo u tla ithabela ka Morena, ke tla u fa borena bo kaholimo-limo naheng ena le boiketlo lefeng la Jakobo ntat’ao. Sena se tsoa molomong oa Morena.
PESALEMA 85
MPONTŠE TSELA EA HAU, MORENA, ‘ME KE TLA TSAMAEA ‘NETENG EA HAU.
Sekeha tsebe, Morena, ‘me u nkarabe,
hobane ke mofutsana le mohloki.
U mpaballe hobane ke motsoalle oa hau,
pholosa mohlanka oa hau ea u tšepang.
U nkhauhele, Morena, Molimo oa ka,
hobane ke hoeletsa ho uena tsatsi lohle.
Thabisa pelo ea mohlanka oa hau,
hobane ke nyollela pelo ea ka ho uena, Morena.
Ruri uena, Morena, u molemo, ua tšoarela,
u tletse mohau ho bohle ba u rapelang.
Morena, sekehela thapelo ea ka tsebe,
U ele lentsoe la thapeli ea ka hloko.
Ho baloa Evangeling e halalelang e ngotsoeng ke Luka.(5:27-32)
“Ha kea tla ho biletsa ba lokileng pakong, empa baetsalibe.”
Ka nako eo, Jesu a bona mokhafisi e mong, ea bitsoang Levi, a lutse tlung ea khafa. A re ho eena. Ntatele. Levi, a tlohela tsohle, a ema ‘me a mo latela.
Ka morao ho moo Levi a mo etsetsa mokete o moholo oa lijo ka tlung ea hae. Bongata bo boholo Bakhafisi le ba bang ba ne ba le teng lijong ‘moho le bona.
Bafarisi le bangoli ba luma-luma, ba re ho barutuoa ba hae: Ke ka baka la’ng ha le e-ja, le e-noa le Bakhafisi le baetsalibe? Jesu a fetola, a re ho bona: Ha se ba phelang hantle ba hlokang ngaka, empa ke ba kulang. Ha kea tla ho biletsa ba lokileng pakong, empa baetsalibe.
