La 27 Hlakola 2025

Beke 7 har’a selemo

Labone

Ho baloa Bukeng ea Siraka. (5:1-10)

“Se liehe ho khutlela ho Morena.”

Se behe pelo maruong a hau, u se re: “Ha ke sa hloka letho.” Se khannoe ke maikutlo a hau a matla ho latela litakatso tsa pelo ea hau. Se re: “Nka busoa ke mang?” Hobane ho phetetsa teng Morena o tla phetetsa. Se re: “Ke entse sebe; joale ke hlahetsoe ke’ng?” Hobane Morena o tseba ho iphapanya.

Se tšepe hakaalo ho tšoareloa hoo u phaellang sebe holim’a sebe. Se re: “Morena o mohau haholo, o tla ntšoarela libe tse ngata tsa ka.” Hobane mohau o teng ho eena, empa le eona khalefo e teng, bohale ba hae bo tla oela baetsalibe holimo.

Se liehe ho khutlela ho Morena, u se ho thisise letsatsi le letsatsi, hobane khalefo ea Morena e tla tla hang-hang, ‘me u tla timela tsatsing la phetetso. Se behe pelo ea hau maruong a fumanoang ka bolotsana, hobane a ke ke a u thusa ka letho tsatsing la litlokotsi.

PESALEMA 1

HO LEHLOHONOLO MOTHO EA BEHANG TŠEPO EA HAE HO MORENA.

Ho lehlohonolo motho

ea sa lateleng keletso ea ba khopo,

ea sa beheng le leoto tseleng ea baetsalibe,

ea sa luleng mokhatlong oa basomi;

ea inahanang ka molao oo nyene le bosiu.

O ka sefate se hlonngoeng pel’a mehloli ea metsi,

se behang litholoana ka nako ea teng,

seo mahlaku a sona a sa poneng,

mesebetsi eohle ea hae e’a atleha.

Ha se ntho e tšoanang le ho ba khopo,

bona ba kang ‘moko o fefoloang ke moea;

hobane Morena o tseba tsela ea ba lokileng,

athe tsela ea ba khopo e’a timetsa.

Ho baloa Evangeling e halalelang e ngotsoeng ke Mareka. (9:40-49)

“Ho molemo ho uena ho kena bophelong o le tsohana, ho e-na le ho ea liheleng, u e-na le matsoho a mabeli.”

Ka nako eo, Jesu a re ho barutuoa ba hae: Mang le mang ea tla le fa mohope oa metsi ka baka la hobane le ba Kriste, ruri kea le bolella, a ke ke a haelloa ke moputso oa hae. Empa mang le mang ea tla khopisa e mong oa ba banyenyane bana ba lumetseng ho ‘na, ho ka ba molemo ho eena hore a tlamelloe lejoe la leloala molaleng ‘me a liheloe leoatleng.

Ha letsoho la hau le u khopisa, u le pome. Ho molemo ho uena ho kena bophelong u le tsohana, ho e-na le ho ea liheleng, mollong o sa timeng, u e-na le matsoho a mabeli.

Ha leoto la hau le u khopisa, u le khaole. Ho molemo ho uena ho kena bophelong bo sa feleng, u le kotoane, ho e-na le ho lahleloa liheleng, u e-na le maoto a mabeli. Ha leihlo la hau le u khopisa, u le honye. Ho molemo ho uena ho kena ‘musong oa Molimo u le moihloe, ho e-na le ho lahleloa liheleng, u e-na le mahlo a mabeli, moo seboko sa bona se sa shoeng le moo mollo o sa timeng. Efela motho e mong le e mong o tla nokoa ka mollo.

Letsoai le molemo, empa ha letsoai le thethefetse, le tla nokoa ka’ng? Le be le letsoai ka ho lona, ‘me le be le khotso har’a lona.