Moeletsi oa Basotho Sehopotso sa Thomas Aquinas ea Halalelang Moprista le Moruti oa Kereke
Labobeli
Ho baloa Bukeng ea Moprofeta Ezekiele. (3:16-21)
“Ke u behile molebeli oa ba ntlo ea Israele.”
Matsatsing ao, lentsoe la Morena le ile la mphihlela, la re: “Mor’a motho, ke u behile molebeli oa ba ntlo ea Israele; etlere, ha u utloa tse tsoang molomong oa ka, u e’o ba hlokomelisa bitsong la ka.
Ha nka re ho ea khopo: ‘Ruri u tla shoa,’ eaba uena ha u mo hlokomelise, leha e le ho mo susumeletsa ho tlohela metsamao e mebe ea hae hore a phele, motho eo ea khopo o tla shoela sebe sa hae; empa ke uena ea tla ikarabella ka lefu la hae.
Athe teng, ha u ka hlokomelisa ea khopo, eaba eena o hana ho khutla bokhopong ba hae, leha e le metsamaong e mebe ea hae, eena o tla shoela sebe sa hae; empa uena u tla pholosa bophelo ba hau.
Ha ea lokileng a ka furalla ho loka ha hae, ‘me a etsa se fosahetseng, ke tla etsa hore a khoptjoe, a oe: o tla shoa. O tla shoela sebe sa hae, hobane ha u’a ka ua mo hlokomelisa. Liketso tse lokileng tsa hae ha li sa tla hopoloa. Empa ke uena ea tla ikarabella ka lefu la hae.
Athe teng, ha u ka hlokomelisa ea lokileng hore a se ke a etsa sebe, ‘me a fela a se ke a se etsa, ruri o tla phela, hobane o hlokomelisitsoe; le uena u tla pholosa bophelo ba hau.”
PESALEMA 15
KE UENA, MORENA, EA MPOLOKELANG KABELO EA KA.
Ak’u mpaballe, oho Molimo,
hobane ke tšabela ho uena.
Ke itse ho Morena: “Ke uena Moren’a ka.
Morena, ke uena lefa la ka le mohope oa ka,
ke uena ka sebele ea mpolokelang kabelo ea ka.”
Ke tla boka Morena, moeletsi oa ka;
le bosiu pelo ea ka e ntse e ntaea.
Ke ikemiselitse hore e be sa le
ke hopotse Morena kamehla;
ha Morena a le pel’a ka, nke ke ka oa.
O tla mpontša tsela ea bophelo,
thabo e khaphatsehang e fumanoang ho eena,
le nyakallo e sa feleng
e fuoang ba lulang pel’a hau.
Ho baloa Evangeling e halalelang e ngotsoeng ke Luka (22:24-30)
“Ke le lokisetsa ‘muso, joaloka ha Ntate a ile a ntokisetsa oona.”
Ka nako eo, ha hlaha khang har’a barutuoa, ea hore na har’a bona ke mang ea shejoang e le e moholo ho feta ba bang. Eaba Jesu o re ho bona:
Marena a lichaba a rena holim’a tsona, ‘me ba nang le matla holim’a tsona ba rata ho bitsoa Bathusi ba Sechaba. Ho lona, ho se be joalo, empa eo e leng e moholo har’a lona a be joaloka e monyenyane, ‘me ea laelang a be joaloka ea sebeletsang. Ho ea lutseng lijong le ho ea sebeletsang, e moholo ke mang? Na ha se ea lutseng lijong? Athe ‘na, ke har’a lona joaloka ea sebeletsang. Lona le bile le ‘na kamehla melekong ea ka: ‘me le ‘na ke le lokisetsa ‘muso, joaloka ha Ntate a ile a ntokisetsa oona, hore le tle le je ‘me le noe tafoleng ea ka ‘musong oa ka le hore le lule literoneng le ahlole meloko e leshome le metso e ‘meli ea Israele.
