Moeletsi oa Basotho Beke ea 3 har’a selemo
‘Mantaha
Ho baloa Lengolong ho Ba-Heberu. (9:15.24-28)
“Kriste o inyehetse hanngoe ho hlakola libe tsa ba bangata; o tla hlaha la bobeli ho tla pholosa ba mo lebeletseng.”
Bana beso! Kriste ke ‘moelanyi oa selekane se secha. Ka lefu la hae o lefeletse libe tse neng li etsoe tlas’a selekane sa pele, hore ba bitsitsoeng ba tle ba amohele lefa le sa feleng, leo ba le baletsoeng.
Jesu ha a ka a kena sehalalelong se entsoeng ka matsoho, e leng setšoantšo sa ‘nete, a mpa a kena leholimong la sebele, a tle a itlhahise pel’a sefahleho sa Molimo bakeng la rona.
Ha a ka a inyehela ka makhetlo a mangata, joaloka ha moprista e moholo a kena sehalalelong ka selemo le selemo ka mali ao e seng a hae; hoja ho ne ho le joalo, e ne e ka khona a utloisoe mahloko hangata ho tloha ha e sa le lefatše le thehiloe.
Kanthe o hlahile hanngoe feela, qetellong ea linako, ho felisa sebe ka sehlabelo sa hae. ‘Me joaloka ha ho laetsoe hore batho ba shoe hanngoe, ba nt’o ahloloa, ka mokhoa o joalo le eena Kriste o inyehetse hanngoe ho hlakola libe tsa ba bangata: ‘me o tla hlaha la bobeli, e se e se ka baka la sebe, empa e le ho tla pholosa ba mo lebeletseng.
PESALEMA 97
BINELANG MORENA SEFELA SE SECHA, HOBANE O ENTSE TSE TSOTEHANG.
Binelang Morena sefela se secha,
hobane o entse tse tsotehang.
O hlotse ka seatla sa hae,
ka letsoho le halalelang la hae.
Morena o bontšitse pholoho ea hae,
o bonahalitse toka ea hae mahlong a lichaba.
O ikhopolitse mohau le botšepehi ba hae
bakeng la ntlo ea Israele.
Liqola tsohle tsa lefatše
li bone pholoho ea Morena oa rOna.
Lona mafatše ‘ohle, etsetsang Morena litlatse,
hlasimolohang ke thabo, le mo roke ka lifela.
Binelang Morena ka harepa,
ka harepa le ka ‘mino.
Ka meletso ea literompeta le ea liphala,
etsetsang Morena Molimo litlatse.
Ho baloa Evangeling e halalelang e ngotsoeng ke Mareka. (3:22-30)
“E se e le ho fela ha Satane.”
Ka nako eo, bangoli ba neng ba theohile Jerusalema ba ne ba re: o kenoe ke Beelzebule; hape: o leleka bademone ka morena oa bademone. Eitse hoba a ba biletse ho eena, a bua le bona ka papiso, a re:
Satane a ka leleka SAtane joang na? ‘Muso o arohaneng ho itoantša, ke ‘muso o ke keng oa tiea. Le ntlo e arohaneng ho itoantša, ke ntlo e ke keng ea tiea. Joale haeba Satane a emeletse ho itoantša, a ikarotse, a ke ke a tšoarella: e se e le ho fela ha hae. Ha ho motho ea ka kenang ka tlung ea seqhobane ho hapa thepa ea sona ha a sa qale pele ka ho se tlama a nt’o hapa se katlung ea sona.
Ka ‘nete kea le bolella, bana ba batho ba tla tšoareloa libe le linyefolo tsohle tseo ba ka nyefolang ka tsona. Ha e le ea nyefolang Moea o Halalelang, a ke ke a fumana tšoarelo le ka mohla, empa o tla ba le molato oa sebe se sa feleng.
O n’a rialo, hobane ba ne ba re: o kenoe ke moea o litšila.
