Moeletsi oa Basotho Beke ea 1 har’a selemo
Labotšelela
Ho baloa Lengolong ho Ba-Heberu. (4:12-16)
“A re ke re atamele ka tšepo setulong sa mohau.”
Bana beso! Lentsoe la Molimo lea phela, le matla, le kena ho feta sabole e mahale a mabeli; le phunyeletsa ho fihlela moo ‘mele o kopanang le moea teng, le moo manonyeletso a kopanang teng le ‘moko, ‘me le ka hlaIohanya maikutlo le menahano ea pelo. Ha ho sebopuoa leha se le seng se patehileng ho eena, empa lintho tsohle li feela ‘me li pepeneneng ho eena, eo re tlang họ ikarabella ho eena.
Joale ere ka ha re e-na le moprista e moholo ea keneng leholimong, e leng Jesu Mor’a Molimo, a re tieeng ho bontša tumelo ea rona. Efela Moprista e moholo oa rona ha se ea ka sitoang ho re utloela bohloko mefokolong ea rona, empa ke ea lekiloeng ka mekhoa eohle joaloka rona, le hoja a se na sebe.
Ka baka leo a re keng re atamele ka tšepo setulong sa mohau, hore re tle re fumane lereko ‘me re etsetsoe mohau neng le neng ha re hloka thuso.
PESALEMA 18
POLELO TSA HAU, MORENA, KE MOEA, EBILE KE BOPHELO.
Molao oa Morena o phethehile, o fana ka bophelo;
temoso ea Morena e nepahetse, e hlalefisa sethoto.
Litaelo tsa Morena li lokile, li thabisa pelo;
taolo ea Morena e hlakile, e khantšetsa mahlo.
Ke ntho e ntle ho tšaba Morena,
e ke ke ea fetoha le khale;
likahlolo tsa Morena ke tsa ‘nete,
li lokile kaofela.
Li khahleha ho feta gauda,
ho feta gauda e ngata e tšekehileng;
li monate ho feta linotši le lekheha la tsona.
U khahloe ke mantsoe a molomo oa ka
le menahano ea pelo ea ka;
li ke li amohelehe ho uena, Morena,
lefika la ka le molopolli oa ka.
Ho baloa Evangeling e halalelang e ngotsoeng ke Mareka. (2:13-17)
“Ha kea tla ho bitsa ba lokileng, empa baetsalibe.”
Ka nako eo, Jesu a boela a tsoela nqa ea leoatleng ‘me sechaba sohle se ne se e-tla ho eena, ‘me o n’a se ruta. Eitse ha a feta a bona Levi, mor’a Alfea, a lutse ka tlung ea khafa ‘me a re ho eena: Ntatele. Eaba Levi o’a ema ‘me a mo latela. ‘Me ha etsahala hore ha ba le lijong ka tlung ea Levi, bakhafisi le baetsalibe ba bangata ba lule hammoho le Jesu le barutuoa ba hae; etsoe ba ne ba le bangata ba mo latelang.
Ha bangoli le Bafarisi ba bona hore Jesu o ja le bakhafisi le baetsalibe, ba botsa barutuoa ba hae, ba re: Ke ka baka la’ng ha a e-ja ‘me a e-noa le bakhafisi le baetsalibe na? Jesu a utloa hona ‘me a re ho bona: Ba hlokang ngaka ha se ba phelang, empa ke ba kulang. Ha kea tla ho bitsa ba lokileng, empa baetsalibe.
