Moeletsi oa Basotho Beke ea 1 har’a selemo
Labone
Ho baloa Lengolong ho Ba-Heberu.(3:7-14)
“Le mpe le khothatsane ha ho sa ntsane ho thoe kajeno.”
Bana beso! Moea o halalelang o re: Kajeno ha le utloa lentsoe la Molimo, le se ke la ithatafatsa lipelo, joaloka mohla phetohelo, mohla letsatsi la teko feelleng, moo bo-ntat’a lona ba ileng ba nteka, ba ‘nonya, leha ba bone mesebetsi ea ka ka lilemo tse mashome a mane.
Ka baka leo nkile ka halefela moloko ona ‘me ka re: Ba kheloha kamehla lipelong, ha ba tsebe litsela tsa ka. Ka ba ka hlapanya khalefong ea ka, ka re: Ba ke ke ba kena phomolong ea ka le khale. Hlokomelang, bana beso, e se re mohlomong pelo e mpe e ka ba teng ho e mong oa lona, ea ho se lumele, ea ho khaohana le Molimo ea phelang. Le mpe le khothatsane ka matsatsi ‘ohle ha ho sa ntsane ho thoe: Kajeno; ho se ke ha eba e mong oa lona ea ithatafatsang ka ho thetsoa ke sebe.
Efela re filoe kabelo ho Kriste, ha re fela re tiisetsa, ho isa qetellong, tšepong e tiileng eo re bileng le eona qalehong.
PESALEMA 94
HOJA LE KA MAMELA LENTSOE LA HAE KAJENO! LE SE KE LA ITHATAFATSA LIPELO.
Tloong, re inameng, re itiheleng fatše,
re khumameleng Morena ea re entseng.
Ke eena Molimo oa rona,
rona re sechaba se boliseng ba hae,
mohlape o matsohong a hae.
Hoja le ka mamela lentsoe la hae kajeno!
Le se ke la ithatafatsa lipelo
joaloka ha le le Meriba,
joaloka mohla le leng Massa feelleng,
moo bo-ntat’a lona ba ileng ba nteka,
ba ‘nonya leha ba bone mesebetsi ea ka.
Ka lilemo tse mashome a mane
ka tenoa ke moloko ona, ka ba ka re:
“A sechaba se pelo li hlahlathelang,
se sa tsebeng litsela tsa ka!”
Ke ho halefa ka hlapanya, ka re:
“Ha ba ka ke ba kena phomolong ea ka le khale.”
Ho baloa Evangeling e halalelang e ngotsoeng ke Mareka. (1:40-45)
“Lepera la mo tlohela, eaba oa fola.”
Ka nako eo, molepera e mong a tla ho Jesu, a mo rapela a khumama ‘me a re ho eena: Ha u rata, u ka mpholisa. Jesu a mo utloela bohloko, a nanabetsa letsoho, a mo ama, a re ho eena: Kea rata, fola. ‘Me hang lepera la mo tlohela, eaba oa fola.
Jesu a mo laea ka thata, hore a tsamaee ka pele-pele, a ntse a re ho eena: Hlokomela, u se bolelle motho: empa e-ea, u ipontše ho moprista ‘me u nyehele ka se laetsoeng ke Moshe bakeng la pholiso ea hau, e tle e be bopaki ho bona.
Empa eena, hoba a ikele, a qala ho bolela le ho tumisa taba eo, hoo Jesu a neng a s’a bile a sitoa ho kena motseng a bonoa; a s’a itulela nahathothe, ‘me batho ba ne ba tla ho eena, ba hlaha kahohle.
