Moeletsi oa Basotho Kamor’a Boiponahatso
‘Mantaha
Ho baloa Lengolong la Pele la Moapostola Joannes. (3:22 4:6)
“Le nonye meea hore na ke ea Molimo.”
Baratuoa! Eng le eng eo re tla e kopa re tla e fuoa ke Molimo, kahobane re boloka melao ea hae ‘me re etsa tse mo khahlisang. Molao oa hae ke ona: re lumele ho Mora oa hae Jesu Kriste, ‘me re ratane kamoo a re behetseng molao kateng. Ea bolokang melao ea hae o lula ho Molimo, ‘me Molimo o lula ho eena. Re tseba ka hona hore o lula ho rona, ka Moea oo a re nehileng oona.
Baratuoa, le se ke la tšepa moea ofe le ofe, le mpe le nonye meea hore na ke ea Molimo, hobane baprofeta ba bohata ba bangata ba tlile lefatšeng.
Seo moea oa Molimo o tsejoang ka sona ke sena: moea o mong le o mong o bolelang hore Jesu Kriste o tlile a ikentse motho, ke oa Molimo. Athe moea o mong le o mong o sa ananeleng Jesu ha se oa Molimo. Ona moea ke oa Sera sa Kriste, seo le utloileng hore sea tla; le hona joale se se se le lefatšeng.
Lona le ba Molimo, bana ba ka ba banyenyane, ‘me le hlotse baprofeta ba bohata, hobane moea o leng ka ho lona o matla ho feta o leng teng lefatšeng. Bona ke ba lefatše, ka baka leo ba bua tsa lefatše ‘me lefatše lea ba utloa. Rona re ba Molimo. Ke ka tsela ena re ka khethang moea oa ‘nete ho moea oa bokhelohi.
PESALEMA 2
KE TLA U FA LICHABA E BE LEFA LA HAU.
Ke tla phatlalatsa taelo ea Morena.
Morena o itse ho ‘na:
U Mora oa ka ke u tsoetse kajeno.
Kopa, ke tla u fa lichaba e be lefa la hau,
le lefatše ka bophara e be leruo la hau.
Joale hee, lona likhosi ipheng kelello,
ikeletseng, lona babusi ba lefatše,
sebeletsang Morena ka tšabo,
le mo hlahisetseng tlhompho ka thothomelo.
Ho baloa Evangeling e halalelang e ngotsoeng ke Matheus. (4:12-17.23-25)
“Muso oa maholimo o se o le haufi.”
Ka nako eo, ha Jesu a utloa hore Joannes o litlamong, a ea Galilea. A tloha Nazaretha, a ea aha Kafarnauma e lebopong la leoatle, tikolohong ea Zabulone le Neftali. Ka hona ha phethahala se neng se ile sa boleloa ke moprofeta Isaia, ha a re:
Lefatše la Zabulone le lefatše la Neftali,
Tsela ea leoatle, naha e mose ho Jordane,
Galilea ea lichaba!
Sechaba se neng se lutse lefifing
se bone leseli le leholo,
le moriting oa lona,
ba chabetsoe ke leseli.
Ho tloha nakong eo Jesu a qala ho ruta, a re: Sokolohang, hobane ‘muso oa maholimo o se o le haufi. O n’a e-ea le Galilea eohle, a ntse a ruta matlung a thapelo a hona teng, a phatlalatsa Litaba tse monate tsa ‘Muso, a folisa mafu le maloetse ‘ohle sechabeng.
Eaba botumo ba hae bo aparela Siria eohle, ‘me ha tlisoa ho eena bakuli bohle ba jeoang ke mafu a mefuta-futa, ba imetsoeng ke mahloko, ba tšoenngoang ke bademone, ba shoang sethoathoa le ba omeletseng litho; a ba folisa. A ba a lateloa ke matšoele a mangata a tsoang Galilea, Dekapolise, Jerusalema, Judea le naheng e mose ho Jordane.
