Moeletsi oa Basotho Sehopotso sa Basile e moholo le Gregory oa Nazianze ba Halalelang, Babishopo le Baruti ba Kereke
Labone
Ho baloa Bukeng ea Siraka. (15:1-6)
“Ea bolokang Molao ka ho tlala o tla rua bohlale.”
Ea tšabang Morena o etsa tsena tsohle, ea bolokang Molao ka ho tlala o tla rua bohlale. Bo tla mo khahlametsa joaloka ‘m’a, bo mo amohele joaloka monyaluoa ea hloekileng. Bo tla mo ngoathela bohobe ba kutloisiso bo mo khelle metsi a bohlale.
O tla ikokotlela ka bona ‘me a ke ke a thekesela, o tla bo khomarela ‘me a ke ke a tlontlolleha. Bo tla mo phahamisetsa ka holim’a ba habo, bo mo fe bokheleke ha a bua a le har’a phutheho. O tla fumana thabo le tlokola ea nyakallo, lebitso la hae le tla tuma kamehla.
PESALEMA 36
MOLOMO OA EA LOKILENG O NTS’A PUO TSA BOHLALE.
Tšepa Morena, ‘me u etse tse ntle,
aha lefatšeng ‘me u iphelele ka khotso.
Ithabele ka Morena,
‘me o tla araba likopo tsa pelo ea hau.
Beha se u hlahelang kapel’a Morena,
u be u mo tšepe, ke eena ea tla bona se ka etsoang.
A totobatse joaloka leseli ho loka ha hau,
le litokelo tsa hau joaloka motšeare oa lenyeta.
Molomo oa ea lokileng o ntša puo tsa bohlale,
le leleme la hae le bolela toka;
Molao oa Molimo oa hae o ka pelong ea hae,
‘me mehato ea hae e ke ke ea rerekela.
Ho baloa Evangeling e halalelang e ngotsoeng ke Matheus. (23:8-12)
Eo e leng e moholo har’a lona ke eena eo e tla ba mohlanka oa lona.
Ka nako eo Jesu a re ho barutuoa ba hae: Le se ke la bitsoa bo-Rabbi, hobane moruti oa lona o mong feela, ‘me bohle le bana ba motho. Ho se be motho eo le ‘mitsang Ntat’a lona lefatšeng, hobane Ntat’a lona o mong feela, ke ea leng maholimong.
‘Me le se bitsoe Baruti, hobane moruti oa lona o mong feela, ke Kriste. Eo e leng e moholo har’a lona ke eena eo e tla ba mohlanka oa lona. Mang le mang ea iphahamisang o tla kokobetsoa, ‘me ea ikokobetsang tla phahamisoa.
