Moeletsi oa Basotho Beke ea tsoalo
Labobeli
Ho baloa Lengolong la Pele la Moapostola Joannes. (2,18-21)
“Le amohetse Moea o Halalelang ‘me le tseba tsohle.”
Bana ba ka ba banyenyane, nako ena ke ea qetello. Le se le utloile hore Sera sa Kriste sea tla, esita le hona joale bao e leng lira tsa Kriste ba bangata ba se ba le teng. Ka hona re tseba hore ke nako ea qetello. Ba tsoile har’a rona, empa e ne e se ba rona. Hoja e ne e bile ba rona, ruri ba ka be ba setse le rona; empa ba tsoile hore ho tle ho totobatsoe hore ha se ba rona.
Empa lona le amohetse Moea o tsoang ho Ea halalelang ‘me bohle le tseba ‘nete. Ha kea le ngolla joaloka hoja le le ba sa tsebeng ‘nete, empa le le ba e tsebang, etsoe leshano le ke ke la tsoa ‘neteng.
PESALEMA 95
MAHOLIMO A KE A THABE, LE LEFATšE LE NYAKALLE.
Binelang Morena sefela se secha,
binelang Morena, lona mafatše ‘ohle.
Binelang Morena, le boke lebitso la hae,
tumisang pholoho ea hae ka matsatsi ‘ohle.
Maholimo a ke a thabe, le lefatše le nyakalle.
Leoatle le ke le rore ‘moho le tsohle tse ka ho lona.
Masimo a ke a nyakalle, le tsohle tse ho ‘ona,
Lifate tsohle tsa meru li etse litlatse tsa thabo.
Li etse litlatse tsa thabo pel’a Morena,
hobane o’a tla, o tlil’o ahlola lefatše.
A ke a ahlole lefatše ka toka.
le lichaba ka ‘nete ea hae.
Ho baloa Evangeling e halalelang e ngotsoeng ke Joannes. (1,1-18)
“Lentsoe la e-ba motho.”
Pele tsohle li qaleha. Lentsoe le ne le le teng: Lentsoe le ne le e-na le Molimo, ‘me Lentsoe e ne e le Molimo. Le ne le e-na le Molimo pele tsohle li qaleha. Tsohle li entsoe ka lona, ‘me ha ho letho le entsoeng ha e se ka lona. Tsohle tse entsoeng li bile le bophelo ka lona, ‘me bophelo e ne e le leseli la batho. Leseli la khanya lefifing, ‘me lefifi ha lea ka la le bipetsa.
(Ha e-ba teng motho ea ronngoeng ke Molimo, lebitso la hae e le Joannes. A tla ka bopaki, hore a tle a pakele leseli e le hore bohle ba Iumele Ka eena. Eena e ne e se leseli empa paki ea leseli.]
Lentsoe e ne e le leseli la ‘nete, le neng le tlile lefatšeng ho tla khantšetsa batho bohle. Le ne le le lefatšeng, ‘me lefatše le entsoe ka lona, empa lefatše ha lea ka la le tseba. Le ile la tla ha habo lona, empa ba habo lona ha ba ka ba le amohela.
Athe bohle ba le amohetseng, le ba file matla a ho fetoha bana ba Molimo, e leng ba lumelang ho lona ba sa kang ba tsoaloa ka mali kapa ka nama, leha e le ka thato ea monna, empa e le ba tsoetsoeng ke Molimo. ‘Me Lentsoe la e-ba motho ‘me la aha har’a rona, ‘me re bone letlõtlo la lona, e leng letltlo la Mora’ inotši oa Ntat’ae leo Ntat’a a le fileng Mora, ea tletseng mohau le ‘nete.
[Joannes o mo pakile, a hooa, a re: Ke eena eo ke neng ke bua ka eena ha ke re: Ea tlang ho tla ka morao ho ‘na o mphahametse, hobane o n’a le teng pele ho ‘na.
Bohle re amohetse ho tlaleng ha hae, mohau holim’a mohau. Molao o n’o nehiloe ka Moshe, athe mohau le ‘nete li tlile ka Jesu Kriste.
Ha ho motho ea kileng a bona Molimo le ka mohla, empa mora a inotši oa Molimo, ea leng sefubeng sa Ntat’ae, ke eena ea entseng hore a tsejoe.]
