Moeletsi oa Basotho Beke ea tsoalo
‘Mantaha
Ho baloa Lengolong la Pele la Moapostola Joannes. (2,12-17)
“Ea phethang thato ea Molimo o hlola ka bosafeleng.”
Kea le ngolla, lona bana ba ka ba banyenyane, hobane, le tšoaretsoe libe ka baka la lebitso la Jesu. Kea le ngolla, lona bo-ntat’a, hobane le tsebile ea leng teng ho tloha qalehong ea tsohle. Kea le ngolla, lona bahlankana, hobane le hlotse E mobe. Kea le ngolla lona bana ba banyenyane, hobane le tsebile Ntate. Kea le ngolla, lona bo-ntat’a, hobane le tsebile ea leng teng ho tloha qalehong ea tsohle.
Kea le ngolla, löna bahlankana, hobane le matla, Lentsoe la Molimo le lutse ho lona, ‘me le hlotse E mobe. Se rateng lefatše, leha e le letho la tse lefatšeng. Ha motho a rata lefatše, lerato la Ntate ha le eo ho eena, hobane hohle ho lefatšeng ke se lakatsoang ke botho se khahlang mahlo le seo batho ba ikakasang ka sona bophelong bona; ‘me hona ha ho tsoe ho Ntate empa ho tsoa lefatšeng. Lefatše le feta hammoho le litakatso tsa lona, athe ea phethang thato ea Molimo o hlola ka bosafeleng.
PESALEMA 95
MAHOLIMO A KE A THABE, LE LEFATšE LE NYAKALLE.
Tlisang linyehelo, le kene mabaleng a hae,
khumamelang Morena ea tlotlehang ‘me ea halalelang.
Thothomelang pel’a hae,
lona mafatše ‘ohle.
Bolellang lichaba, le re:
Morena ke khosi!
Ka hona lefatše le tiile,
le ke ke la sisinyeha.
Ho baloa Evangeling e halalelang e ngotsoeng ke Luka. (2,36-40)
“Anna a bua ka ngoana ho bohle ba neng ba lebeletse topollo ea Israele.”
Ka nako eo, ho no ho le teng Anna, moprofeta oa mosali, morali oa Fanoele, oa leloko la Ashere. O n’a s’a holile haholo. O n’a ile a phela le monna oa hae ka lilemo tse supileng hoba a nyaloe, ‘me ea e-ba mohlolohali ho fihlela a le lilemo li mashome a robeli a metso e mene. O n’a sa tlohe Tempeleng, moo a neng a sebeletsa Molimo ka boitimo le ka thapelo nyene le bosiu. A fihla ka eona nako eo, a boka Molimo, ‘me a bua ka ngoana ho bohle ba neng ba lebeletse topollo ea Israele.
Eitse ha ba se ba phethile tsohle ka ho ea ka molao oa Morena, ba boela Galilea, motseng oa habo bona, Nazaretha. Ha e le ngoana, o n’a hola, a matlafala, a tletse bohlale. Le mahlohonolo a n’a le ho eena.
