Moeletsi oa Basotho Beke ea 3 ea Advente
‘Mantaha
Ho baloa Bukeng ea Lipalo, (24,2-7.15-17)
Matsatsing ana, ha Baalame a phahamisa mahlo a bona Ba-Israele ba hlophisitsoe ka meloko ea bona. Eaba moea oa Molimo o ba ka ho eena. A roka, a re:
Polelo ea Baalame, mor’a Beore,
polelo ea monna ea mahlo a nchocho,
polelo ea ea utloang mantsoe a Molimo.
O bona lipono tsa Ea matla-‘ohle,
o utloa karabo ea Molimo:
‘me mahlo a hae a tutuboloha.
Li ntle hakaakang tente tsa hau, Jakobo!
le meaho ea hau, Israele.
Li alehile joaloka liphula,
joaloka lirapa lebopong la noka,
joaloka makhala a hlonngoeng ke Morena,
joaloka likedare pel’a metsi!
Mohale o hlaha har’a litloholo tsa hae.
O rena holim’a lichaba tse ngata.
Moren’a hae o phahametse Hagare,
le ‘muso oa hae oa hola.
Balaame a boela a roka, a re:
Polelo ea Balaame, mor’a Beore;
polelo ea monna ea mahlo a nchocho,
polelo ea ea utloang mantsoe a Molimo.
O na le tsebo ea tsa Ea holimo-limo,
o bona lipono tsa Ea matla-‘ohle,
o utloa karabo ea Molimo
‘me mahlo a hae a tutuboloha.
Kea ‘mona, empa e seng hona joale;
kea ‘moha, empa e seng a le haufi.
Naleli e tsoang ho Jakobo ea busa,
lere la borena le tsoa ho Israele.
PESALEMA 24
MPONTšE ‘MILA OA HAU, MORENA.
Mpontše ‘mila oa hau, Morena,
u nthute litsela tsa hau.
U ntataise ‘neteng ea hau ‘me u nthute,
hobane ke uena Molimo Mopholosi oa ka.
Morena, se lebale mosa le mohau oa hau,
tseo e sa leng li le teng ho tloha khale.
Nteballe libe le litlolo tsa bocheng ba ka,
u nkhopole ka mohau oa hau.
Morena o molemo ‘me o lokile;
ka baka lena o khutlisetsa baetsalibe tseleng.
O tataisetsa ba eisehang ho lokeng.
‘me o ruta ba fokolang tsela ea hae.
Ho baloa Evangeling e halalelang e ngotsoeng ke Matheus. (21,23-27)
“Hlatsuo ea Joannes e ne e e-tsoa hokae na?”
Ka nako eo, ha Jesu a se a fihlile ka tempeleng, baprista ba baholo le baholo ba sechaba ba tla ho eena, ha a nts’a ruta, ba re: U etsa tsena ka matla afe na? Ke mang ea u nehileng matla ao na?
Jesu a ba araba, a re: Le ‘na ke tla le botsa lentsoe le le leng, leo ekareng ha le ka mpolella lona, le ‘na ke tla le joetsa na ke etsa tsena ka matla afe. Hlatsuo ea Joannes e ne e e-tsoa hokae na? Leholimong kapa ho batho?
Empa bona ba inahana, ba re: Ha re ka re: leholimong, o tla re ho rona: Ha ho le joalo, ha lea ka la mo lumela ka baka la’ng? Athe ha re ka re: ho batho, re tšaba sechaba; hobane bohle ba ne ba talima Joannes e le moprofeta. Eaba ba arabela Jesu, ba re: Ha re tsebe. ‘Me le eena a re ho bona: Le ‘na nke ke ka le joetsa matla ao ke etsang tsena ka ‘ona.
