Moeletsi oa Basotho Beke ea 1 ea Advente
Laboraro
Ho baloa Bukeng ea Moprofeta Isaia. (25,6-10)
“Morena o re memela moketeng oa hae oa linonneng ‘me o hlakola meokho sefahlehong se seng le se seng.”
Ka letsatsi leo, thabeng ena ea Sione Morena oa makhotla o tla lokisetsa lichaba tsohle mokete oa lijo tsa linonneng, oa liveine tse monate-nate, oa nama tse moro o mafura, oa liveine tse tlhotlehileng hantle.
Thabeng ena o tla felisa khurumetso e koahetseng lichaba tsohle, le lesira le sirileng merabe eohle. O tla felisa lefu ho isa khale. Morena Molimo o tla hlakola meokho lifahlehong tsa bohle; lefatšeng lohle a tlose sekhobo sa sechaba sa hae. Morena o buile.
Mohlang oo, ho tla thoe: Enoa ke eena Molimo oa rona, eo re lebeletseng hore o tla re pholosa; ke eena Morena eo re mo lebeletseng. A re nyakalleng, re thabeng hobane oa re pholosa. Efela letsoho la Morena le holim’a thaba ena.
PESALEMA 22
KE TLA LULA KA TLUNG EA MORENA HA FEELA KE NTSE KE PHELA.
Morena ke molisa oa ka, nke ke ka hloka letho.
O nkatla makhulong a matalana.
O ntsamaisetsa metsing a khutsitseng,
o matlafatsa bophelo ba ka.
O ntataisa tseleng e nepahetseng
ho tlotlisa lebitso la hae.
Leha nka tsamaea khohlong e lefifi ba lefu,
ha ke tšabe bobe bofe kapa bofe, hobane u na le ‘na.
U ntekela tafole
pontšeng ea lira tsa ka,
u ntlotsa hloho ka oli,
mohope oa ka oa khaphatseha.
Efela lehlohonolo le mohau li tla mphelehetsa
ka matsatsi ‘ohle a bophelo ba ka;
ke tla lula ka tlung ea Morena
ha feela ke ntse ke phela.
Ho baloa Evangeling e halalelang e ngotsoeng ke Matheus. (15, 29-37)
“Jesu o folisa ba bangata ‘me o atisa mahobe.”
Ka nako eo, Jesu a tla lebopong la leoatle la Galilea, a ba a nyolohela thabeng, a lula teng. Eaba matšoele a mangata a tla ho eena, a e-na le liritsa, ba holofetseng, lifofu, limumu, le ba bang ba bangata, ‘me ba behoa maotong a hae, a ba folisa. Ke moo letšoele le ileng la makala ha le bona limumu li bua, ba holofetseng ba phela hantle, liritsa li tsamaea, lifofu li bona; eaba ba tlotlisa Molimo oa Israele.
Jesu a bitsetsa barutuoa ba hae ho eena, a re: “Ke utloela letšoele lena bohloko, hobane e se e le matsatsi a mararo batho bana ba e-na le ‘na, ‘me ha ba sa na seo ba ka se jang. Ebile ha ke rate ho ba qhala ka tlala, esere mohlomong ba felloa ke matla tseleng.”
Barutuoa ba hae ba re ho eena: “Feelleng moo, mahobe a ka lekanang ho khorisa letšoele le lekale, re tla a nka kae?” Jesu a re ho bona: “Le na le mahobe a makae?” Ba re: “A supileng, le litlhatsoana tse seng kae.”
Hoba a laele letšoele ho lula fatše, a nka mahobe a supileng le litlhapi, ‘me hoba a lebohe, a a ngoatha, a a neha barutuoa ba hae, barutuoa bona ba fa letšoele. Bohle ba e-ja, ba khora, eaba ho bokelloa marathana a setseng, a etsang liroto tse supileng tse tletseng.
