Moeletsi oa Basotho Beke ea 34 har’a selemo
Labohlano
Ho baloa Bukeng ea Tšenolo. (20,1-4.11-21,2)
“Bafu ba ahloloa ka ho ea ka mesebetsi ea bona. Ka bona Jerusalema e mocha a theoha leholimong.”
‘Na Joannes, ka bona lenyeloi le theohang leholimong le tšoere senotlolo sa mokoti o tebileng le ketane e kholo letsohong la lona. La tšoara drakone, noha ea khale e leng diabolosi le satane ‘me la e holeha ka lilemo tse sekete.
La e lahlela mokoting o tebileng, la e notlella teng, la tiisa monyako oa oona holim’a eona, hore e se ke ea hlola e khelosa lichaba, lilemo tse sekete li e-s’o phethehe. Ka morao ho tseo e tšoanetse ho lokolloa nako e seng kae.
Eaba ke bona literone ‘me ba nehiloeng ho ahlola ba lula ho tsona. Ka bona le meea ea ba khaotsoeng lihloho ka baka la ho paka Jesu le ka baka la Lentsoe la Molimo, e leng ba sa kang ba khumamela sebata leha e le setšoantšo sa sona, ba sa kang ba amohela letšoao la sona liphatleng tsa bona kapa matsohong a bona. Batho bao ba boela ba phela, ‘me ba busa le Kriste ka lilemo tse sekete.
Joale ka bona terone e kholo e tšoeu le ea lutseng holim’a eona. Lefatše le leholimo tsa balehela sefahleho sa hae, ‘me ha lia ka tsa hlola li bonoa. ‘Me ka bona bafu, ba baholo le ba banyenyane, ba eme pel’a terone eo.
Libuka tsa phetloa: ha phetloa hape e ‘ngoe e leng buka ea bophelo, ‘me bafu ba ahloloa ka tse ngotsoeng libukeng tseo, ka ho ea ka mesebetsi ea bona.
Leoatle la khutlisa, bafu ba ho lona, Lefu le Qalo-ea bafu tsa khutlisa bafu ba ho tsona, ‘me ba ahloloa e mong le e mong ka mesebetsi ea hae. Eaba Lefu le Qalo ea-bafu li lahleloa letšeng la mollo: letša leo la mollo ke lefu la bobeli. Mang le mang ea sa kang a fumanoa a ngotsoe bukeng ea bophelo a lahleloa letšeng leo la mollo.
Joale ka bona leholimo le lecha le lefatše le lecha; hobane leholimo la pele le lefatše la pele li nyametse, ‘me leoatle ha le sa le eo. ‘Na Joannes, ka bona motse o halalelang, Jerusalema e mocha a theoha ho Molimo leholimong a hlophiloe joaloka monyaluoa ea khabiselitsoeng monyali oa hae.
PESALEMA 83
KE OO MOTLOTLOANE OA MOLIMO HARA BATHO.
Moea oa ka o hlolohetsoe mabala a tempele ea Morena,
hoo nka ‘nang ka shoa;
pelo le litho tsohle tsa ka li hoeletsa ka thabo
ho Molimo ea phelang.
Esita le serobele se iphumanetse lehae,
le lefokotsane ntloana,
eo le behang malinyane a lona ho eona,
haufi le lialetare tsa hau, Morena oa tsohle,
Khosi ea ka le Molimo oa ka.
Ho lehlohonolo ba lulang ka tlung ea hau,
ba u rorisang ba sa khaotse.
Ho lehlohonolo batho bao uena u leng matla a bona;
ba matlafala ho-ea-ho-ile.
Ho baloa Evangeling e halalelang e ngotsoeng ke Luka. (21,29-33)
“Ha le bona tseo li etsahala, tsebang hore ‘Muso oa Molimo o haufi.”
Ka nako eo Jesu a bolella barutuoa ba hae papiso, a re: Bonang sefate sa feiga le lifate tse ling tsohle. Ha li se li hlahisa monoko, le tseba ka bo-lona, hore joale lehlabula le haufi. Ka mokhoa o joalo, le lona ha le bona tseo li etsahala, tsebang hore ‘Muso oa Molimo o haufi.
Ka ‘nete ke re ho lona, moloko ona o ke ke oa feta, tsohle tseo li e-s’o etsahale. Leholimo le lefatše li tla feta, empa mantsoe a ka a ke ke a feta.
