Nthabeleng Seitlheko Mokhatlo oa SHE-HIVE Association ka kopanelo le mafapha a fapakaneng o ketekile Letsatsi la Machaba la Banna, le ba hopotsang ho ema ka hohle ho nena tlhekefetso le ho e tlaleha. Litaba tsena li bile ka la 19 Pulungoana monongoaha.
Lebitsong la SHE-HIVE ‘Maleshota Setota, o hlalositse hore letsatsi lena le ketekoa selemo le selemo ho hopotsa banna boikarabello ba bona ho thibela tlhekefetso. O re ke tsela eo ba ba bontšang tsotello ka eona kaha boholo ba nako ba ne ba siheletsoe morao.
O re banna le bashanyana ba lokela ho tlaleha tlhekefetso ea mefuta eohle le ho e nena kaha ho etsa joalo e le mohato o motle oa ho ba le sechaba se phetseng hantle ‘meleng le moeeng, se bile se e-na le khotso.
A re e bang motho a tšaba ho tlaleha tlhekefetso sepoleseng a ka tlalehela motho ea haufi le eena, ‘me seo se ka thusa hore a thusoe ka tlhabollo ebe mohlekefetsi o nkeloa likhato tsa molao. O re ke takatso ea bona hore kamor’a ketekelo ea matsatsi a kang ana, ho bonahale litlaleho tsa tlhekefetso li phahama.
P/C Matsoso Montši e bile e le setho sa Mokhatlo oa LMPS Men’s Forum, o itse ho ne ho sa tloaeleha hore motho a ka tloha lapeng e le monna ho tlaleha tlhekefetso, hobane banna ba tumme ka ho sebelisa maele a ‘monna ke nku ha lle’ a seng a sa sebetse.
O re banna le bahlankana ba tlameha ho tlaleha tlhekefetso ea mefuta eohle, kaha ho etsa joalo ho ba thusa ho nena litlolo tsa molao. O re ha ba hlokomela hore banna le bahlankana ba bonahala ba etsa litlolo tsa molao ka bongata, ba ile ba ithuta hore bothata ke eng, eaba ba ikeletsa e le banna ba mapolesa ho theha mokhatlo o tla ba thusa ho kopana le sechaba haholo banna le bahlankana ho etsa matšolo a tlhokomeliso.
O re pele e ba mapolesa ke karolo ea sechaba ka hona ba lokela ho nka karolo litabeng tse amang sechaba kaha e se mekhelo. O re banna ba tsebe hore basali ba sireletsoa ke bona, ha ba ba hlorisa ba senya lefatše kaha basali ha ba le matla, malapa a hola hantle a bile a thabile.
“Banna ba eme ka maoto hohle moo ba phelang teng ‘me ba nene tlhekefetso le ho loanela kholiso e ntle ea bana ba bashanyana kaha kamoso ba tla be ba tšoere malapa.” Ke Montši eo.
Moemeli oa Mokhatlo oa Southern African Policy Alcohol Alliance Thabo Mokhutšone, o re ba rata ho ntlafatsa meralo e mecha le ho matlafatsa e teng litabeng tsa tšebeliso ea joala le ho etsa ebe ba fana ka lipalo hore na tšebeliso e mpe ea tai le lithetefatsi e kenya letsoho joang litabeng tsa tlhekefetso.
Ha joale o re ba ntse ba etsa liphuputso hore tšebeliso ea joala e na le khahlamelo efe, Ha Mokhothu, Teya-Teyaneng le Lithoteng, Maseru. O re batho bohle ba lokela ho sebelisa joala ka tsela e nepahetseng e nang le seriti, ‘me ‘muso o ntlafatse melao molemong oa sechaba.
E mong oa bacha ba bileng ketekelong ena, Tšelisehang Masasa, o hlalositse a thabile kaha a hlokomela hore e le bahlankana ba se ba kenyeletsoa linthong tse ngata ‘me tšepo ea bona e khutlile kaha ba ne ba bona e ka bophelo ba bona bo tla ba tsietsing.
O ipilelitse ho bacha ho nena tlhekefetso haholo bahlankana hore e tle e be bo-ntate ba kamoso ba nang le boikemelo. A re tlhekefetso e ngata bacheng boholo ke ea lipuo e etsang hore bacha ba bang ba se nke karolo le linthong tse ba amang, ka hona ho bohlokoa hore e le bacha ba nke karolo litabeng tsa mofuta ona ho ba karolo ea sechaba e tsoetseng pele.
