Moeletsi oa Basotho Sehopotso sa Tlhahiso ea Maria Movirigo Tempeleng
Labone
Ho baloa Bukeng ea Pele ea Lietsahala. (15,3-4.15-16;16,1-2)
“Ha tlisoa areka ea Molimo, ea behoa kahar’a Tente eo Davida a e hlometseng eona.”
Matsatsing ao, Davida a bitsetsa ba-Israele bohle Jerusalema ho ea lata areka ea Morena, le ho e tlisa qalong eo a e lokiselitseng eona. Davida a phutha bara ba Aarone le ba-Levi. Bara ba ba-Levi ba jara areka ea Molimo mahetleng a bona ka mesikaro e ho eona, joaloka ha Moshe a n’a laetse, ka ho ea ka polelo ea Morena.
Davida a bolella baokameli ba ba-Levi hore ba hlophise bana babo bona, e leng libini, hore ba eme ka liletsa, e leng liharepa, licithara licimbala, tseo ba tla li letsa ka matla ho bontša nyakallo.
Eitse hoba ho tlisoe areka ea Molimo, ea behoa kahar’a Tente eo Davida a e hlometseng eona; ha nyeheloa mahlabelo a licheso le a khotso pel’a Molimo. Hoba Davida a qete ho nyehela mahlabelo a licheso le a khotso, a hlohonolofatsa sechaba ka lebitso la Morena.
PESALEMA 112
HO BOKOE LEBITSO LA MORENA KAMEHLA.
Lona bahlanka ba Morena, rorisang,
rorisang lebitso la Morena.
Ho bokoe lebitso la Morena,
ho tloha joale ho isa khale.
Ho tloha Bochabela ho isa Bophirima,
ho rorisoe lebitso la Morena.
Morena ke eena ea phahametseng lichaba tsohle,
letlotlo la hae le feta maholimo.
Ke mang ea joaloka Morena Molimo oa rona
ea lulang holimo-limo
ea inamang ho sheba maholimo le lefatše,
ea ntšang mofutsana litholeng,
ea nyollang mohloki thotobolong,
họ mo beha har’a mahosana,
le mahosana a sechaba sa hae.
Ho baloa Evangeling e halalelang e ngotsoeng ke Luka. (2,41-52)
“Jesu o fumanoa har’a baruti ka Tempeleng.”
Ha Jesu a le leshome le metso e ‘meli la lilemo, baholo ba hae ba nyolohela Jerusalema, joaloka ha e le tloaelo ka letsatsi la mokete. Ha mokete o felile, eare ha ba khutla, ngoana Jesu a sala Jerusalema, ‘me batsoali ba hae ha ba ka ba tseba. Ba tsamaea letsatsi lohle, ba hopola hore o sehlopheng se seng; eaba ba ‘matla har’a bang ka bona le ba tsebanang le bona. Ha ba sa mo fumane, ba khutlela Jerusalema, ba ntse ba ‘matla.
Ka morao ho matsatsi a mararo, ba mo fumana ka Tempeleng, a lutse har’a baruti, a ba mametse ‘me a ntse a ba botsa. Bohle ba neng ba mo utloa, ba ne ba tsota kelello ea hae le likarabo tsa hae. Ha ba ‘mona, ba makala, ‘me ‘m’ae a re ho eena: Ngoan’a ka, u re entse joalo ka baka la’ng na? Bona, ntat’ao le ‘na re u batlile re le matsoalong.
A re ho bona: Ke ka baka la’ng, ha le ne le mpatla na? Hleka le ne le sa tsebe hore ke tšoanetse ho ba ho tseo e leng tsa Ntate na? Empa bona ha ba ka ba utloisisa seo a ba bolellang sona. Eaba o theoha le bona, a boela Nazaretha, ‘me a ipeha tlas’a bona. ‘Me ‘m’ae o n’a boloka tsena tsohle ka hloko ka pelong ea hae. Ha e le Jesu, o n’a hola bohlaleng, lilemong le grasieng pel’a Molimo le pel’a batho.
