Moeletsi oa Basotho Beke ea 33 har’a selemo
‘Mantaha
Ho baloa Bukeng ea Tšenolo. (1,1-4;2,1-5)
“Lemoha moo u oeleng teng, u bake.”
Ke ena tšenolo e tlileng ka Jesu Kriste. Tsena ke tseo a li nehiloeng ke Molimo, hore a tle a bontše bahlanka ba hae tse tlang ho etsahala haufi. Kriste a li romela ka Lenyeloi ho mohlanka oa hae Joannes. Ke eena ea pakang Lentsoe la Molimo, a tiisang bopaki ba Jesu Kriste holim’a tsohle tseo a li boneng. Ho lehlohonolo ea balang, ea utloang mantsoe ana a boprofeta, ‘me ea bolokang tse ngotsoeng ho ‘ona, hobane nako e se e le haufi.
Joannes ho likereke tse supileng tse leng Asia: Le ke le etsetsoe mohau ‘me le nehoe khotso ke Ea leng teng, Ea bileng teng ‘me Ea tlang ho tla, le ke meea e supileng e emang pel’a terone ea hae.
Ka utloa Morena a re ho ‘na: Ngolla Lenyeloi la kereke e Efese, u re: Ke tsena tse boleloang ke ea tšoereng linaleli tse supileng letsohong la hae le letona, ea tsamaeang har’a mabone a supileng a gauda. Ke tseba mesebetsi ea hau, boikhathatso le tiisetso ea hau. U sitoa ho iphapanyetsa ba khopo. U nontse ba ipitsang baapostola empa e se bona, ‘me ua fumana hore ba leshano. Ua tiisetsa; u mnameletse mahloko ka baka la lebitso la ka, ‘me ha ua ka ua tepella. Empa ke u bona molato oa hore u khoehlile leratong la hau la pele. Ka baka leo lemoha moo u oeleng teng, u bake ‘me u boele mesebetsing ea hau ea pele.
PESALEMA 1
EA HLOTSENG KE TLA MO FA TOKELO EA HO JA LITHOLOANA TSA SEFATE SA BOPHELO.
Ho lehlohonolo motho
ea sa lateleng keletso ea ba khopo,
ea sa beheng le leoto tseleng ea baetsalibe,
ea sa luleng mokhatlong oa basomi;
empa e le ea khahloang ke molao oa Morena,
ea inahanang ka molao oo nyene le bosiu.
O ka sefate se hlonngoeng pel’a mehloli ea metsi,
se behang litholoana ka nako ea teng,
seo mahlaku a sona a sa poneng;
mesebetsi eohle ea hae ea atleha.
Ha se ntho e tšoanang le ho ba khopo,
bona ba kang ‘moko o fefoloang ke moea;
hobane Morena o tseba tsela ea ba lokileng,
athe tsela ea ba khopo ea timetsa.
Ho baloa Evangeling e halalelang e ngotsoeng ke Luka. (18,35-43)
“U rata hore ke u etsetse’ng? Morena, ke bone!”
Ha etsahala hore ha Jesu a atamela Jeriko, sefofu se seng se ne se lutse pel’a tsela, se ntse se kopa. Eare ha se utloa letšoele le feta, sa botsa hore na taba ke’ng. Ba se bolella hore ke Jesu oa Nazaretha ea fetang. Eaba se hooa, se re: Jesu, Mor’a Davida u nkhauhele!
Ba neng ba le kapele ba se khalemela hore se khutse. Empa sona sa hooa ho feta pele: Mor’a Davida, u nkhauhele! Jesu a ema, a laela hore se tlisoe ho eena. Eitse ha se atametse, a se botsa, a re: U rata hore ke u etsetse’ng? Sa re: Morena, ke bone!
Jesu a re ho sona: Bona! Tumelo ea hau e u pholositse. ‘Me hang sa bona, sa mo latela, se ntse se tlotlisa Molimo, ‘me sechaba kaofela se boneng hoo sa rorisa Molimo.
