Moeletsi oa Basotho Beke ea 23 har’a selemo
Labohlano
Ho baloa Lengolong la Bobeli la Moapostola Joannes. (4-9)
“Ea tiisetsang thutong ena, o na le Ntate le Mora.”
Mofumahali mokhethuoa! Ke ile ka thaba haholo ha ke fumana baneng ba hau, ba bang ba tsamaeang ‘neteng, ka molao oo re o amohetseng ho Ntate. ‘Me joale, Mofumahali, ke u kopa hore bohle re ratane. Ha ke u ngolle molao o mocha, empa ke oo re bileng le oona ho tloha qalong.
Lerato ke lena; ho phela ka ho ea ka melao ea Molimo. ‘Me molao, joaloka ha le utloile e sa le ho qaleng, ke ona: phelang leratong.
Bakhelosi ba bangata ba hlahile lefatšeng, ba sa boleleng hore Jesu Kriste o ile a iketsa motho. Ea rialo ke mokhelosi le Sera sa Kriste. Itlhokomeleng, le tle le se ke la lahla tseo le li sebelitseng, le mpe le amohele moputso o tletseng.
Mang le mang ea khelohang, ‘me a sa tiisetse thutong ea Kriste, ha a na Molimo: ea tiisetsang thutong ena, eena o na le Ntate le Mora.
Pesalema 118
HO LEHLOHONOLO BA METSAMAO E SENANG KOLI.
Ho lehlohonolo ba metsamao e se nang koli,
ba latelang Molao oa Morena.
Ho lehlohonolo ba utloang litemoso tsa hae,
ba ‘matlang ka pelo tsohle tsa bona.
Ke u batla ka pelo eohle ea ka,
se ntumelle ho kheloha melao ea hau.
Ka pelong ea ka ke phuthetse pallo ea hau,
e se re ka u fosetsa.
Etsa mohlanka oa hau hantle;
ke tle ke phele, ke be ke boloke lentsoe la hau.
Ntutubolle mahlo,
ke tle ke bohe tse tsotehang tsa Molao oa hau.
Ho baloa Evangeling e halalelang e ngotsoeng ke Luka. (17,26-37)
“Ho tla ba joalo letsatsing leo Mor’a motho a tla bonahatsoa ka lona.”
Ka nako eo, Jesu a re ho barutuoa ba hae: Joaloka ha ho ne ho etsahale mehleng ea Noe, ho tla ba joalo le mehleng ea Mor’a motho. Batho ba ne ba e-ja, ba e-noa, ba nyalana, ho fihlela letsatsi leo Noe a kenang arekeng ka lona, ‘me moroallo oa tla, oa ba timetsa kaofela.
‘Me ho tla ba joaloka ha ho ne ho le mehleng ea Lota. Batho ba ne ba e-ja ‘me ba e-noa, ba reka ‘me ba rekisa, ba lema ‘me ba aha; empa ka letsatsi leo Lota a tsoileng Sodoma ka lona, Molimo a nesa mollo le sebabole tse tsoang leholimong ‘me tsa ba timetsa bohle. Ho tla ba joalo letsatsing leo Mor’a motho a tla bonahatsoa ka lona.
Ka letsatsi leo, ea tla ba holim’a ntlo, liphahlo tsa hae li le ka tlung, a se ke a theoha ho ea li nka; ‘me ea tla ba naheng, le eena a se ke a khutlela morao. Hopolang mosali oa Lota. Mang le mang ea tla batla ho pholosa bophelo ba hae bo tla mo lahlehela; athe ea tla lahleheloa ke bona o tla bo pholosa.
Kea le bolella, ka bosiu boo ba babeli ba tla ba phateng e le ‘ngoe: e mong o tla nkuoa, e mong a siuoe. Basali ba babeli ba tla sila hammoho: e mong o tla nkuoa, e mong a siuoe.
Barutuoa ba ‘motsa, ba re: Ke hokae, Morena? Eena a re ho bona: Moo setopo se tla ba teng, ke hona moo manong a tla bokana teng.
